DILI, 08 juñu 2024 (TATOLI)—Ekipa Assa FC susesu iha nia jornada daruak hodi konkista vitória ba dala-rua iha kopa Federasaun Futeból Timor-Leste (FFTL) faze grupu, bainhira manán husi adversáriu Rai Klaran FC ho eskore 4-0.
Ho rezultadu ne’e, lori Assa provizóriu lidera grupu B ho pontu neen. Jogu ba ekipa rua ne’e realiza iha Estádiu Munisipál Dili, sábadu lorokraik ne’e.
Jogu ba ekipa rua, Assa mak sai hanesan ekipa uma-na’in, enkuantu Rai Klaran hanesan ekipa bainaka, bainhira minutu jogu nian komesa, ne’ebé orienta husi árbitru Bernardino Mascarinhas, juiz liña Filomeno da Silva, Gabriel Pereira no árbitru rezerva Pedro Braga, autoriza jogu la’o, ekipa rua lansa kedan kontra no atake ba malu tuir tékniku no abilidade ekipa ida -idak nian, nune’e bele prodús golu.
Jogu ne’e la’o iha situasaun ne’ebé estraordináriu tanba hetan suporta másimu husi adeptu lubun husi klube rua nian, ne’ebé tuur haleu tribun Estádiu nian, hakilar ho lian maka’as hodi fó kontente ba jogadór sira.
Armada Assa hatudu jogu ofensivu no la fó frakeza ba Rai Klaran, nune’e Assa halo mós jogu defensivu bainhira adversáriu halo presaun, maibé Assa domina liu bola iha kampu laran.
Rai Klaran hanesan ekipa ne’ebé foun, foin mak joga ba dalauluk iha Estádiu Dili, nunka lakon esperansa maski hetan presaun maka’as husi adversáriu.
Maski halo presaun barak, maibé Assa susar iha finalidade. Defeza Rai Klaran mós nunka fó tempu ba avansadu Assa atu hala’o jogu tuir sira-nia hakarak.
Haree ba jogu susar tebes, treinadór Assa, Francisco Araujo, dada sai jogadór Junilson Lelo (20) hodi hatama fali jogadór Adriel Pereira (23) iha minutu 22. Husi mudansa ba jogadór ne’e fó duni rezultadu di’ak ba Assa tanba jogu la’o to’o minutu 35 jogadór Patrick Koame (19) utiliza nia esperiénsia jogu hodi prodús golu ida muda rezultadu ba 1-0.
Notísia relevante : Assa FC ‘dere’ Irmão Timor FC ho eskore 3-2
Ho velosidade jogu ne’ebé maka’as iha kampu laran halo jogadór Rai Klaran, João da Costa halo erru hasoru jogadór Assa, nune’e árbitru foti kedan desizaun hodi fó kartaun kinur ba jogadór ne’e hanesan xamada atensaun ida nune’e bainhira komete tan, tenke simu kartaun mean hodi sai bá kampu li’ur, erru ne’e jogadór ne’e halo iha minutu 37.
Maski nune’e, Rai klaran nafatin hatudu jogu ne’ebé bonitu, hodi avansadu Rai Klaran nian hetan oportunidade atu prodús golu, maibé la konsege tanba defeza Assa la fó fatin, ho nune’e Rai Klaran nafatin hela ho zero maski jogu la’o durante minutu barak ona.
Presaun ne’ebé Assa halo adekuadu tebes, treinadór Francisco la tuur nonok de’it iha banku jogadór, nia halai bá-mai iha kampu ninin hodi fó orientasaun ba jogadór sira, nune’e bele hala’o jogu tuir saida mak nia fó ona durante formasaun.
Orientasaun husi treinadór ne’e la hela de’it hanesan orientasaun, ikus fó duni rezultadu di’ak tanba minutu 45 jogadór médiu Salvadór Carlos (55) konsege fura tan rede Rai Klaran hodi muda rezultadu ba 2-0. Golu ne’ebé Salvadór halo hanesan golu ikus ba ekipa rua iha minutu dahuluk parte tanba to’o minutu 45 termina laiha tan golu ruma, nune’e Assa mak lidera provizóriu jogu ho eskore 2-0.
Hakat ba parte daruak, iha minutu 46 treinadór Rai Klaran haree ba nia jogadór sira iha kampu laran presiza halo mudansa nune’e nia dada sai jogadór na’in-tolu dala-ida husi liña klaran, avansadu no guarda rede, hanesan David Tilman (12) troka ho jogadór Juvenal Boavida (20), Rosário Nunes (22) troka fali ho Hermenegildo Sarmento (27) no Litígio Borges (13) troka ho jogadór Gaudêncio Osório (4) nu’udar guarda rede.
Maski halo ona mudansa jogu, maibé Rai Klaran nafatin enfrenta difikuldade iha kampu laran tanba jogadór Assa lansa atake ne’ebé maka’as, iha tempu parte daruak ne’e, avansadu Assa lansa sutu barak maibé sutu barak falla no barak mós la kona iha alvu, nune’e halo lakon Assa nia oportunidade golu lubuk ida.
Ho intensidade jogu ne’ebé sa’e maka’as, halo jogadór Assa Patrick la kontrola-an iha minutu 50 nian, halo erru hasoru jogadór Rai Klaran, ikus árbitru tenke fó kedan kartaun kinur hanesan xamada atensaun bainhira komete tan erru simu tan kartaun mean.
Minutu la’o ho kalma, jogu la’o ho barullu, jogadór Assa hetan oportunidade barak tan maibé sempre falla halo jogadór Andriel Pereira (23) la kontrola-an iha minutu 65 komete erru no árbitru foti tan desizaun fó kedan kartaun kinur ba jogadór ne’e.
Treinadór Francisco la satisfáz ho rezultadu golu rua ne’e, nia iha ambisaun orienta nafatin jogadór sira atu aumenta golu, nune’e iha minutu 68, avansadu Assa José Rogrigues (21) konsege ezekuta jogu ho di’ak lansa tan golu ida hodi muda rezultadu ba 3-0, ne’ebé golu ne’e halo jogadór Assa selebra ho kontente, maibé jogadór Rai Klaran tenke hamriik nonok ho laran triste.
Rai Klaran nafatin pasiénsia hodi hatudu nafatin jogu ne’ebé brillante maski falla iha finalidade hodi prodús golu, maibé nafatin hatudu jogu ne’ebé ho kualidade nudar jogadór profisionál.
Minutu hakur daudaun ba oin, jogadór Assa nian ladun antisipa ho di’ak halo Rai Klaran komesa lansa ameasa, iha minutu 73 treinadór deside dada sai tan jogadór na’in-rua Andriel Pereira (23), Patrick Koame hodi substitui fali jogadór Renjo Correia (27) no Paulo Godinho (10), nune’e bele halo defensivu maka’as iha liña kotuk no bele ajuda liña klaran hatama bola ba avansadu.
Ho mudansa ne’ebé treinadór Assa halo, konsege asegura duni nia ekipa, nune’e halo Rai Klaran falla maka’as atu prodús golu, nune’e iha minutu ikus, minutu jogu atu termina ona iha minutu 90+1 jogadór suplente Renjo Correia termina golu ikus muda rezultadu ba 4-0.
Husi rezultadu ne’e lori Assa iha direitu absoluta ba gaña pontu tolu no Rai Klaran tenke hela ho derrota ho pontu zero hodi hein jogu seluk tuir mai.
Husi rezultadu ne’e, lori Assa lidera provizóriu iha tabela klasifikasaun grupu B ho pontu neen, pozisaun segundu ATL. Mota Ain FC ho pontu tolu, terseiru Mushila FC ho pontu tolu hanesan ho Mota Ain maibé diferente golu, ikus liu Rai Klaran ho pontu zero.
Deklarasaun treinadór
Bainhira jogu termina, treinadór Assa Francisco Araújo fó kedan parabéns ba ekipa Rai Klaran, ne’ebé hatudu jogu bonitu halo sira falla atu prodús golu barak.
“Parabéns ba ekipa Rai klaran, maski sira lakon, maibé sira hatudu jogu ne’ebé di’ak, sira-nia estratejia halo ami susar hatama golu barak, ami lakon golu barak tanba sira-nia defeza hatudu jogu ne’ebé di’ak tebes. Rezultadu ne’e ami manán maibé ami tenke serbisu maka’as iha jogu tuir mai tanba hasoru ekipa todan hanesan Mota Ain,” Francisco haktuir ba Agência Tatoli.
Nune’e, nia rekoñese fallansu barak mak jogadór Assa halo, maibé sei hadi’a iha semana hirak mai oin molok hasoru ekipa Motain FC.
“Ami hasoru Mota Ain ne’e todan, maibé ha’u sei esforsu nune’e bele manán atu ami bele hakat ba oitu finál,” nia tenik.
Iha fatin hanesan, treinadór Rai Klaran Júlio Dias, sente triste tanba lakon maibé konsidera hanesan esperiénsia ba nia ekipa atu apreende liután iha jogu sira tuir mai.
“Ida-ne’e la’ós ona ikus ba ami, ami foin mai joga primeiru iha Estádiu ne’e, ba ami sente triste maibé normál, jogu la’ós ne’e de’it, ba oin ami sei prepara-an maka’as atu kompete ho di’ak,” treinadór tenik.
Jornalista : Hortencio Sanchez
Editora : Julia Chatarina
