DILI, 08 juñu 2024 (TATOLI)–Prezidente Repúblika (PR), José Ramos Horta, hamutuk ho Primeiru-Ministru (PM), Kay Rala Xanana Gusmão no membru Governu sira, sábadu ne’e, lansa ‘Peixe Azúl’ iha tasi-ibun, Palásiu Governu nia oin, ho ámbitu komemora loron mundiál Oseanu.
Peixe Azul hanesan fatin ida hodi ema hotu bele soe lixu plástiku ba laran, nune’e empreza sira-ne’ebé halo resiklajen bele foti fali hodi labele halo plástiku tama bá tasi-laran hodi halo foer tasi.
“Iha loron ida-ne’e atu fó hanoin ba ita atu labele soe foer arbiru bá tasi, liu-liu plástiku, ita soe foer arbiru, udan boot mai, foer tonelada ba tonelada tama bá tasi laran estraga hotu animál sira iha tasi-laran, fatin ne’ebé agora ita lansa ne’e atu soe foer hanesan plástiku, karik bele soe tama ba laran, ita la soe foer arbiru, ita-nia tasi sei mós no furak,” PR Horta hateten durante intervensaun iha serimónia lansa ‘Peixe Azúl’.
Notísia relevante : Xefe Governu apela ba sidadaun hotu labele soe plástiku arbiru
Horta nota problema boot iha mundu inklui Timor-Leste mak ema soe lixu nunka tau iha nia fatin loloos.
“Ita-nia sosiedade seidauk eduka didi’ak. Ba oin ema hotu tenke hatene-an ona atu soe lixu iha nia fatin. Liu-liu foin-sa’e sira imi mak sai ezemplu hodi soe foer iha nia fatin, mundu ne’e nia futuru iha imi-nia liman,” nia akresenta.
Iha okaziaun ne’e, Xefe Governu Xanana Gusmão, esplika, Peixe Azul hanesan simbulu ida ba timoroan hotu, nune’e bele soe lixu iha nia fatin.
“Husu ba populasaun iha Dili atu labele soe plástiku arbiru, proteje ita-nia tasi. Bainhira ita soe lixu iha nia fatin, empreza sira bele halo resiklajen, mai foti bele prodús fali ba buat ne’ebé bele hetan osan,” PM Xanana tenik.
Xanana dehan, eventu ne’e sei ajuda enkoraja interese iha Timor-Leste nia oferta turizmu mariñu no poténsia sira.
Iha Peixe Azúl ne’e nia sorin hatuur mós plaka ida-ne’ebé marka ho letra dehan ‘Proteje ita-nia planeta, mai ita tau-matan ba ita-nia Oseanu! Keta husik plástiku ba para iha tasi-laran, tau iha ne’e ita-nia botir plástiku,’
Selebrasaun loron mundiál Oseanu iha Timor-Leste sei hala’o durante loron-11, ho nia tema: ‘Ha’u-nia Tasi, Ha’u-nia Timor.’
Jornalista : Hortencio Sanchez
Editora : Julia Chatarina
