COVALIMA 08 juñu 2024 (TATOLI)–Sekretáriu Estadu Dezenvolvimentu Lokál (SEDL), Mateus dos Santos Tallo, hamutuk ho nia ekipa inklui Prezidente Autoridade munisípiu (PAM) Covalima, sábadu ne’e, observa direta vítima dezastre naturál husi suku Suai-Loro, postu administrativu Suai, ne’ebé evakua ona bá sentru evakuasaun dezastre naturál iha Eskola Sekundáriu Jerál Suai.
Udan ho intensidade boot iha semana ne’e nia-laran halo inundasaun maka’as, obrigadu populasaun kuaze 600 husi aldeia Loro, Loo no Mane-Ikun, suku Suai-Loro mobiliza bá sentru evakuasaun.
“Ha’u hanesan membru Governu mai haree ita-boot, ho kbiit ne’ebé Governu iha halo intervensaun hodi halo serbisu atende ita-boot sira, ami iha nasionál akompaña hela situasaun, tanba udan maka’as hodi hamosu inundasaun. Governu iha obrigatóriu atu salva komunidade iha situasaun emerjénsia no atende ita-boot sira,” Sekretáriu Estadu Mateus hateten, bainhira observa vítima dezastre iha sentru evakuasaun.
Notísia relevante : Inundasaun iha Suai Loro obriga retira ema 546 husi nia hela fatin
Governante ne’e fó hanoin ba vítima dezastre naturál sira atu aguenta hela iha sentru evakuasaun tanba bazeia ba meteorolojia nia prediksaun, sei akontese tan udan to’o aban, maski tuir informasaun iha terrenu, vítima sira-nia hela fatin bee menus ona.
Ho nune’e, Sekretáriu Edtadu koordena no orienta Prezidente Autoridade munisípiu Covalima atu fasilita ai-han ba vítima dezastre durante hela iha sentru evakuasaun, tanba hanesan kompeténsia autoridade atu serví povu ne’ebé afetadu inundasaun.
Iha sorin seluk, PAM Covalima, Miguel Armanda Cardoso, hateten, parte autoridade munisipál hamutuk ho komisaun sei halo intervensaun.
Komisaun Jestaun Risku Desastre Naturál Covalima kompostu husi Servisu Munisipál, Protesaun Sivíl no Jestaun Dezaste Naturál, Autoridade Protesaun Sivíl (APC, sigla portugés) no Sentru Solidariedade Sosiál no Inkluzaun Sosiál ho nia parseiru sira hanesan Cruz Vermelha Timor-Leste (CVTL) , World Food Programme (WFP), Care, Word Vision no Mercy Corps.
“Ita nafatin agradese tanba durante udan ekipa halo evakuasaun vítima husi nia hela fatin, laiha inan-aman ida falta maibé kompletu hodi evakua mai to’o iha sentru evakuasaun. Tanba ne’e, ha’u nafatin alerta presiza kuidadu saúde, bainhira moras karik presiza halo konsulta,” nia dehan.
Normaliza estragu
Sekretáriu Estadu Mateus dos Santos ho ekipa tuun ba terrenu hodi observa mós vítima afetadu dezastre naturál nia hela fatin no natar ne’ebé a’at tanba inundasaun
“Husi observasaun ne’e relata ba Primeiru-Ministru atu orienta entidade relevante bele haree hodi normaliza hotu fatin ne’ebé hetan estragu,” nia haktuir.
Hafoin identifika vítima sira-nia hela fatin no natar ne’ebé hetan estragu, PAM sei elabora relatóriu ba Munistériu Administrasaun Estatál (MAE) hodi submete fali ba Konsellu Administrasaun Fundu Infraestrutura (KAFI).
Atu rezolve impaktu husi dezastre naturál, Ministériu Obra Públika (MOP) no Ajénsia Dezenvolvimentu Nasionál, Institutu Públiku (ADN, I.P) presiza haree didi’ak.
“Ita presiza hadi’a planu urbanizasaun atu haree sidade ne’e, tanba ita hela iha bee dalan sira ne’e problema, nune’e Governu presiza haree no redús problema inundasaun,” nia dehan.
Antes ne’e, udan hahú iha loron 30-31 maiu to’o loron 01 juñu, nune’e APC rejista uma-kain afetadu dezastre naturál ne’e hamutuk 256, kompostu husi postu Tilomar 43, Maucatar ida, Suai 107 no Zumalai 105 .
Jornalista : Celestina Teles
Editora : Julia Chatarina
