iklan

INTERNASIONÁL, HEADLINE

Selebra Loron Mundiál Oseanu, Papa Francisco apresia Timor-Leste ba protesaun meiu ambiente

Selebra Loron Mundiál Oseanu, Papa Francisco apresia Timor-Leste ba protesaun meiu ambiente

Reprezentante Santa Sé iha Timor-Leste, Monseñor Marco Sprizzi. Imajen Tatoli/Egas Cristóvão

DILI, 09 Juñu 2024 (TATOLI) – Papa Francisco apresia Governu Timor-Leste ne’ebé komemora Loron Mundiál Oseanu 2024, entre loron 08 no 18 Juñu, ho eventu oioin no foku ba dezenvolvimentu Ekonomia Azúl Timor-Leste nian.

Papa Francisco hato’o apresiasaun ne’e liuhusi reprezentante Santa Sé iha Timor-Leste, Monseñor Marco Sprizzi, hafoin fó bensaun bá “Ikan Azúl” ne’ebé lansa husi Prezidente Repúblika, José Ramos-Horta no Primeiru-Ministru, Kay Rala Xanana Gusmão, no akompaña husi membru Governu sira iha tasi-ibun Palásiu Governu, Dili, sábadu ne’e.

“Papa Francisco apresia tebes inisiativa hotu-hotu husi Estadu no Governu Timor-Leste ne’ebé hakarak atu proteje meiu ambiente”, Monseñor Marco Sprizzi hato’o.

Reprezentante Santa Sé iha Timor-Leste ne’e sita mós Ensíklika Laudato Sí ne’ebé Papa Francisco hakerek bazeia bá  liafuan São Francisco nian hodi enkoraja mós ema hotu-hotu iha mundu tomak atu ativu liután iha polítika protesaun ba natureza, tasi no rai-maran.

Papa Francisco liuhusi Monseñor Marco Sprizzi hato’o parabéns mós ba Governu Timor-Leste ne’ebé komemora loron importante ne’e, tanba moos ne’e hanesan obra Maromak nian no limpeza husi li’ur ne’e refleta limpeza husi laran.

Selebrasaun Loron Mundiál Oseanu ba tinan ida-ne’e foka liubá dezenvolvimentu Timor-Leste nia Ekonomia Azúl. Lema ba kampaña nasionál ne’e mak “Ha’u-nia Tasi, Ha’u-nia Timór”. Atividade ne’ebé Governu halo hodi selebra data ne’e hahú husi loron 08 to’o 18 Juñu mak realiza limpeza jerál iha área kosteira sira iha Díli, halo lansamentu ba “Peixe Azul” (Ikan Azúl) iha Palásiu Governu nia oin husi Prezidente Repúblika, José Ramos Horta, ne’ebé destaka perigu husi poluisaun botir plástiku ba tasi no nesesidade atu rezolve problema ambientál ne’ebé sériu ne’e.

Aleinde ne’e halo lansamentu ba Livru ba Labarik ho títulu “O Meu Mar, O Meu Timor” (Ha’u-nia Tasi, Ha’u-nia Timór) husi Primeiru-Ministru Xanana Gusmão, iha Xanana Reading Room, iha Díli.

Entre loron 10 no 12 Juñu, pontu fokál Ekonomia Azúl husi liña ministeriál sira sei halibur hamutuk durante loron tolu hodi partisipa formasaun espesializada lideransa iha Ekonomia Azúl. Sesaun formasaun ida-ne’e nia objetivu mak hametin liután protesaun ambientál, sosiál no ekonómiku ba Timor-Leste nia rekursu mariñu nian.

Iha loron 13 to’o 18 Juñu, iha sesaun sira ba parseiru xave sira seluk inklui organizasaun sira sosiedade sivíl, setór privadu, ONG, mídia, Futuru Joven Embaixadór ba Ekonomia Azúl no mós ba Prezidente Autoridade Munisípiu sira.

Objetivu prinsipál husi Loron Mundiál Oseanu mak atu informa kona-ba impaktu negativu husi asaun umana no atividade iha oseanu hodi dezenvolve ka kria movimentu mundiál ida ba administrasaun oseanu no atu mobiliza no halibur hamutuk populasaun iha mundu tomak ba jestaun oseanu ne’ebe mak sustentavel.

Iha Timor-Leste, Governu ne’ebé lidera husi Primeiru- Ministru Xanana Gusmão fó ona prioridade ida atu foku ba dezenvolvimentu Timor-Leste nia Ekonomia Azúl, ne’ebé nia objetivu mak atu haree ba nasaun nia rekursu sira seluk iha tasi Timór, aleinde nia rekursu mina no gás hodi dudu dezenvolvimentu no mellora timoroan sira hotu nia vida.

Loron Mundiál Oseanu selebra katak tinan iha 08 Juñu. Data ne’e dekreta iha 2008 husi Asembleia Jerál Nasaun Unida, alinde ne’e komemora iha nasaun barak dezde 1992, dezde realizasaun Konferénsia Nasaun Unida sobre Meiu Ambiente no Dezenvolvimentu, ne’ebé hala’o iha Rio de Janeiro, iha tinan referidu.

Notísia relevante: Primeiru-Ministru lansa livru ba labarik sira “O Meu Mar, O Meu Mar”

Jornalista: Hortencio Sanchez

Editora: Maria Auxiliadora

iklan
iklan

Leave a Reply

iklan
error: Content is protected !!