iklan

COVALIMA

Reprezentante povu husu Governu atende urjente família vítima inundasaun iha Covalima

Reprezentante povu husu Governu atende urjente família vítima inundasaun iha Covalima

Inundasaun iha Suai. Foto espesiál.

DILI, 10 juñu 2024 (TATOLI)—Reprezentante povu iha uma fukun Parlamentu Nasionál (PN), liuhusi Deputadu KHUNTO, António Verdiál de Sousa, husu Governu liuhusi Autoridade Protesaun Sívil (APC) ho Ministériu Obra Públika (MOP) atu halo atendimentu urjénsia ba família vítima no infraestrutura sira ne’ebé hetan estragu afeta husi inundasaun iha munisípiu Covalima.

Notísia Relevante: MSSI-ME apoia nesesidade bázika ba komunidade no estudante afetadu inundasaun iha Covalima

“Relasiona ho inundasaun iha munisípiu Covalima, hanesan reprezentante povu liuhusi bankada KHUNTO husu Governu Konstitusionál da-sia (IX), liuhusi Autoridade Protesaun Sívil hodi halo atendimentu ba komunidade ne’ebé afeta ba inundasaun refere ho urjente. Husu mós ba Ministériu Obra Públika atu hadi’a dalan husi postu Tilomar ligasaun postu Fohorem no husi Fohorem ba postu Fatumea ne’ebé kotu,” Nia hato’o iha reuniaun plenária Parlamentu Nasionál, segunda ne’e.

Nia husu, ho inundasaun ne’e inklui hadia bee-dalan ka drainajen no suru rai-monu iha auto estrada atu labele impede bee hodi tama fali ba komunidade nia uma.

Husu nafatin ba MOP liuhusi Eletrisidade de Timor-Leste, Empreza Públiku (EDTL, E.P) atu hadi’a lalais ai-riin eletrisidade ne’ebé monu iha postu Tilomar tanba afeta husi anin no udan ne’ebé boot.

“Husu mós ba ministériu saúde atu delega infermeira no doutór/a sira atu tau matan ba vítima inundasaun refere hodi halo tratamentu ba sira, atu labele hada’et moras seluk ba komunidade afetadu liuliu ba labarik no inan isin rua sira,” nia hateten.

Deputadu FRETILIN, Antonino Bianco mós sekunda ho inundasaun ne’ebé akontese iha parte kosta súl presiza hetan intervensaun urjente.

Notísia Relevante: Inundasaun iha Suai Loro obriga retira ema 546 husi nia hela fatin

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!