iklan

POLÍTIKA

Alterasaun lei imigrasaun bele fó impaktu ba timoroan 5000-resin iha Portugál

Alterasaun lei imigrasaun bele fó impaktu ba timoroan 5000-resin iha Portugál

Deputada Partidu FRETILIN, Nurima Ribeiro Alkatiri. Imajen Tatoli/Osória Marques.

DILI, 11 juñu 2024 (TATOLI)—Deputada husi bankada FRETILIN, Nurima Ribeiro Alkatiri, hateten alterasaun lei imigrasaun husi Governu Portugál bele fó impaktu ba timoroan 5000-resin ne’ebé daudaun ne’e imigra no hela iha Portugál.

Notísia Relevante: PM Xanana lamenta timoroan oho malu iha Fátima, sei deside taka totál GAM-GAR

“Timoroan barak husi númeru ida-ne’e sei hela ilegál, ho entrada em vigór lei foun ne’e sei bele fó impaktu ba timoroan sira-ne’ebé agora iha hela Portugál bele hetan deportasaun.

Impaktu ida seluk mak timoroan sira-ne’ebé agora planeia hela atu ba buka moris iha Portugál no rai Europa seluk sai difisil ona tanba tenke hetan vistu serbisu antes,” Nia hato’o liuhusi deklarasaun polítika iha reuniaun plenária Parlamentu, tersa ne’e.

Bankada FRETILIN lamenta tebes kona-ba konfrontu entre joven timoroan ne’ebé akontese iha Santuáriu Fátima, iha 02 juñu madrugada, rezulta joven timoroan ida ho idade 25 lakon vida no na’in-lima hetan kanek, iha Portugál fatin kultu Sarani Katólika nian mak iha Santuáriu Fátima.

Bankada kondena hahalok ne’ebé uza violénsia ho tipu saida de’it iha rai-laran no iha rai-li’ur, no husu ba autór sira atu kolabora ho prosesu justisa iha Portugál hodi responsabiliza hahalok ida-idak nian iha justisa nia oin.

Husu ba Ministériu Negósiu Estranjeiru no Kooperasaun (MNEK) no embaixada Timor-Leste (TL) iha Portugál atu akompaña nafatin sidadaun timoroan sira-ne’e nia situasaun.

“Situasaun ida-ne’e estraga imajen ita-nia rain no difikulta liután timoroan sira-ne’ebé hakarak buka moris iha Portugál. Tanba hafoin akontesimentu iha Fatima, loron ida tuir mai—iha 03 Juñu, Governu Portugés altera ka muda kedas nia lei imigrasaun ho entrada em vigor imediata, hodi hapara rejime exesionál, ne’ebé bele permite estranjeiru ida tama iha Portugál ho vistu turista. Depois, buka serbisu no hetan tiha serbisu mak trata nia rezidénsia liuhusi manifesta nia interrese. Agora, ho mudansa regra imigrasaun nian, la bele ona, katak estranjeiru ida, inklui timoroan sira hakarak ba serbisu iha Portugál tenke hetan uluk vistu traballu no kontratu traballu ne’ebé trata iha instalasaun embaixada no konsuladu sira Portugál nian,” nia dehan.

FRETILIN fó hanoin ba Estadu TL liuhusi nia órgaun soberania sira, atu asume responsabilidade hanesan Estadu soberanu ida, atu kolabora ho Estadu Portugés hodi buka dalan hamutuk atu tulun timoroan sira respeita regra iha Portugál no garante estabilidade, liuliu evita ódiu no vingansa entre joven sira-ne’ebé hela iha entranjeiru no iha rai-laran atu labele da’et fali ba joven seluk iha fatin seluk.

Relasiona ho akontesementu iha Portugal, Deputada Nurima, lori bankada FRETILIN kontinua apela ba sidadaun hotu-hotu iha rai-laran no iha rai-li’ur atu hakribit violénsia, garante pás no estabilidade hodi kontribui ba dezenvolvimentu Timor-Leste no husu mós atu TL labele haree situasaun ida iha Portugál hodi halo diskriminasaun ba sidadaun seluk liuliu portugés sira iha Timor-Leste.

Nune’e, husu ba Estadu no povu portugés atu labele lori situasaun ida-ne’e hodi jeneraliza timoroan sira-ne’ebé hela iha Portugál ho asaun sira diskriminativu hasoru sira.

Notísia Relevante: FRETILIN fó hanoin Estadu TL garante sidadaun respeita lei iha Portugál

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!