FRETILIN fó hanoin Estadu TL garante sidadaun respeita lei iha Portugál

DILI, 05 juñu 2024 (TATOLI)—Xefe bankada FRETILIN iha Parlamentu Nasionál (PN), Aniceto Longuinhos Guterres Lopes, fó hanoin ba Estadu Timor-Leste (TL) liuhusi órgaun soberania sira atu bele kolabora ho Estadu Portugál hodi buka meiu nesesáriu di’ak-liu atu garante ita-nia sidadaun sira respeita lei no regra iha Portugál.
Notísia Relevante: Konfrontu timoroan iha Fátima la fó impaktu ba kooperasaun bilaterál entre TL ho Portugál
“Bankada FRETILIN fo’o hanoin ba Estadu Timor-Leste, nia órgaun soberanu sira hotu, kona-ba responsabilidade nu’udar Estadu soberanu ida, atu bele kolabora ho Estadu Portugés no buka meiu atu buka dalan ida-ne’ebé nesesáriu no di’ak-liu atu garante katak, ita-nia sidadaun sira sei respeita lei no regra iha Portugál no kolabora ba estabilidade,” Aniceto hato’o
Bankada FRETILIN lamenta violénsia ne’ebé akontese iha santuáriu Fátima iha semana ida-ne’e nia laran, ita hotu simu notísia kona-ba akontesimentu triste no lamentável ne’ebé akontese iha Portugál no akontese kedas iha fanti kultu Katólika nian, iha santuariu Fatima ne’ebé envolve joven timoroan barak no to’o rezulta timoroan ida (1) mate no na’in-lima (5) hetan kanek.
Bankada opozisaun ne’e lamenta tebes ho situasaun ida-ne’e, no kondena utilizasaun violénsia tipu saida de’it.
Bankada desde uluk to’o agora kontinua apela ba sidadaun hotu, iha rai-laran no rai-li’ur atu hakribit violénsia, promove pás no estabilidade, hodi bele garante respeitu no armonia entre timoroan no ho populasaun seluk, hodi nune’e kontribui ba dezenvolvimentu.
Nia apela ba organizasaun sira hotu ne’ebé ejiste tenke kontrola ninia membru sira hodi evita problema no kontribui ba estabilidade.
Eis Prezidente Parlamentu Nasionál ne’e husu ba Estadu no povu portugeza atu labele foti situasaun ida-ne’e hodi labele jeneraliza komunidade timoroan tomak ne’ebé hela iha Portugál, no ajuda atu evita diskursu no asaun ho baze xenofobia no diskriminativu kontra sé de’it.
Notísia Relevante: Membru PN lamenta joven timoroan halo krime iha Fátima-Portugál
Jornalista : Nelson de Sousa
Editór : Cancio Ximenes

