iklan

EDUKASAUN, HEADLINE

Profesora rekrutadu bolsa kandidata retira-an husi ME nia kolokasaun

Profesora rekrutadu bolsa kandidata retira-an husi ME nia kolokasaun

Mapa munisípiu Ermera. Infografia/Octávio Guterres

DILI, 11 juñu 2024 (TATOLI)—Profesora na’in-ida ne’ebé rekrutadu husi programa bolsa kandidatu, retira-an husi Ministériu Edukasaun (ME) nia kolokasaun ba Eskola Ensinu Báziku Sentrál (EBC, sigla portugés) Lação, iha suku Atara, postu administrativu Atsabe, munisípiu Ermera.

“Nia (profesora) naran iha lista ami simu ne’e iha, só ema ne’e mak la mai iha kolokasaun ba Eskola Bázika Filiál (EBF) Atara,” Diretór EBC Lação, Bernão Barros, informa ba Agência Tatoli, via telefónika, tersa ne’e.

Eskola referidu la hetan informasaun direita husi profesora ne’ebé rezigna-an ne’e maibé simu informasaun husi munisípiu.

“Ne’ebé ema ne’e la tama ona no hanorin durante hahú kolokasaun bolsa kandidatu nian, agora hein fali nia subtituisaun husi Ministériu Edukasaun,” nia akresenta.

Notísia relevante : ME loke vaga bolsa kandidatu profesór faze daruak presiza manorin 800

Agrupamentu husi EBC Lação ho EBF tolu mak EBC Lação ho manorin hamutuk na’in-sia, estudante hamutuk 232 kompostu husi mane 108 no feto 124.

“Eskola ne’e sei presiza tan manorin ba disiplina lian portugés ida, istória jeografia na’in-hotu, lian inglés rua, desportu ida, artístika rua, no matemátika ida.

EBF Lação ne’e iha profesór nai’n-lima, ho nia estudante hamutuk 272 kompostu husi mane 137 no feto 135.

“Ida-ne’e ita presiza manorin na’in-rua hodi bele kompleta nune’e prosesu aprendizajen la’o di’ak no másimu,” nia tenik.

Nune’e mós ba EBF Atara nia professór hamutuk na’in-neen, ho totál estudante 300 kompostu husi mane 156 no feto 154, ne’ebé presiza tan professór na’in-rua.

Ba EBF Nunurema ho nia profesór na’in-rua, ho estudante 200 kompostu husi mane 98 no feto 102, ne’ebé presiza tan profesór na’in-haat.

“Foin daudaun ne’e eskola EBF Lação ho EBF Atara mak hetan profesór bolsa kandidatu maibé EBF Atara rezigna-an tiha, tanba ne’e ami presiza no hein nia subtituisaun hosi Ministériu Edukasaun,” nia salienta.

Profesora ne’ebé rezigna-an ho naran Emelia Henrique da Cruz husi munisípiu Lautém, ne’ebé hetan kolokasaun iha EBF Atara.

Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten, nia parte seidauk simu informasaun kona-ba profesora ne’ebé rezigna-an.

“Iha de’it mak informasaun husi ita-nia profesora sira-ne’ebé grávida no balun oan nurak , entaun Ministériu Edukasaun mós tetu ba situasaun ida-ne’e, tanba sira iha área ne’ebé remota tebes no sira labele asesu ba klínika ruma no sentru saúde ruma, Tanba ne’e Ministériu Edukasaun iha toleránsia ba sira hodi mai destaka besik fali ba Sentru Saúde sira, ne’ebé sira bele halo tratamentu nune’e mós ba oan nurak sira,” governante ne’e dehan.

Iha informasaun katak profesór husi programa bolsa kandidatu barak mak sente kontente tanba komunidade lokál simu sira ho di’ak.

“Komunidade mós kontente simu sira tanba pela primeira vez iha istória ukun rasik-an ida ne’e ita koloka profesór sira ba liu iha baze tuir kuadru pesoál ne’ebé iha, no koloka bazeia ba fatin ne’ebé mak menus profesór ne’e ita prenxe daudaun ona fatin,” nia tenik.

Jornalista     : Osória Marques

Editora         : Julia Chatarina

iklan
iklan

Leave a Reply

iklan
error: Content is protected !!