COVALIMA, 11 Juñu 2024 (TATOLI) – Empreza petrolífera Timor Resources fahe informasaun kona-ba impaktu ambientál iha prosesu perfurasaun mina-matan foun Feto Kmaus rua no Liurai rua ba autoridade sira iha Covalima.
Jerente Timor Resources, Filomeno Andrade, hateten, tuir rekizitu, molok empreza atu halo atividade presiza aprezenta estudu ambientál hodi halo esplikasaun ba autoridade no komunidade sira. Tanba iha estudu ne’e, presiza haree katak bainhira halo perfurasaun, mákina nia barullu labele liu nia padraun, movimentu transporte sei hamosu rai-rahun no labele halo mudansa ambientál.
“Ami presiza divulga informasaun ba autoridade sobre prosesu perfurasaun, kona-ba fornesimentu serbisu, mina-matan hira mak atu halo tan perfurasaun no presiza aprezenta estudu ambientál ba populasaun sira atu hatene”, Filomeno Andrade hato’o iha salaun Mais Grureis, ohin.
Bazeia ba rekizitu, aleinde fahe informasaun kona-ba impaktu ambientál, esplika mós sobre partisipasaun komunidade iha projetu perfurasaun hanesan fó empregu, fornesimentu ai-han, no fornese ekipamentu no pesoál tékniku la presiza lori husi fatin seluk.
Iha prosesu perfurasaun ne’e estrutura téknika hamutuk 105 no sei aumenta ho ekipa ne’ebé apoia hamutuk 250. Husi númeru ne’e, sei presiza traballadór barak husi Covalima oan.
Tuir planu, iha Setembru, empreza Timor Resources sei halo tan perfurasaun ba mina-matan foun Feto Kmaus rua ne’ebé lokaliza iha suku Debos, no Liurai rua, ne’ebé lokaliza iha suku Labarai, postu Suai.
Prezidente Autoridade munisípiu Covalima, Miguel Armada Cardoso, relembra, antes ne’e, empreza halo ona perfurasaun ba mina-matan Feto Kmaus, Liurai no Lafaek, ne’ebé hatudu ona nia rezultadu. “Bainhira kompañia atu kontinua halo perfurasaun mina, presiza fahe informasaun ba autoridade no komunidade sira, nune’e prosesu perfurasaun hahú, parte hotu presiza atu partisipa”, salienta.
Notísia relevante: Komunidade afetada ba perfurasaun posu Feto Kmaus rekomenda pontu balun ba Timor Resources
Jornalista: Celestina Teles
Editora: Maria Auxiliadora
