Autoridade RAEOA estabelese ekipa konjunta atu kombate moras Rabies
OÉ-CUSSE, 11 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretáriu Rejionál ba Asuntu Saúde, tersa ne’e estabelese ekipa konjunta ida komposta husi husi pesoál saúde, administradór postu administrativu, Ofisiál Polísia Suku (OPS) no líder komunitária sira atu hamutuk hodi kombate moras Rabirs iha Oé-Cusse Ambeno.
“Ekipa ne’e presiza akumula ema barak, nune’e ema hotu sente katak, moras ne’e la’ós ita haree de’it pesoál saúde sira, maibé ita hotu hamutuk ho nune’e ita bele trava moras ida-ne’e, liuliu iha Oé-Cusse,” Sekretáriu Rejionál ba Asuntu Saúde, Luís de Jesus Neno hateten.
Atividade ne’e, realiza iha sentru saúde Baqui, suku Naimeko, sub-rejiaun Pante Makasar, partisipa mai husi xefe suku na’in-ualu, xefe aldeia no OPS sira,
“Objetivu ohin ne’e, la’ós de’it ba Rabies maibé atubele prevene mós moras oinoin ne’ebé mosu iha ita-nia komunidade nia leet, tan ne’e mak ami presiza serbisu hamutuk ho administradór sub-distritu sira, Ofisiál Polísia Suku (OPS), ho Konsellu Suku sira no pesoál sira tomak ne’ebé estabelese iha postu saúde sira,” nia katak.
Tuir nia, liuhusi kria ekipa ida forte ne’e, atubele haree hamutuk atividade saúde, tán ne’e presiza serbisu hamutuk atubele rezolve kazu oinoin, ne’ebé mosu iha komunidade nia leet, importante liu mak kazu Rabies.
Notísia relevante: MS distribui HRIG bá RAEOA no HNGV prevene rabies
Nia informa, kazu moras rabies oras ne’e tama fulan haat ona, mosu iha Oé-Cusse, rejista ona kazu asu tata ema ne’e 160, husi númeru ne’e asu 19 mak hasai amostra (sampel) iha laboratóriu ho rezultadu pozitivu virus rabies, husi ema mós hasai amostra maibé rezultadu negativu, pozitivu ida mak momentu mate iha Hospital Nasionál Guido Valadares.
Nune’e kona-bá asu sira-ne’ebé simu ona vasinasaun husi Diresaun Agrikultura nian, halo ona vasinasaun ba asu hamutuk rihun 70-resin mak hetan vasinasaun, mai husi sub-rejiaun haat, suku 18 no aldeia 63.
“Ita-nia profisionál saúde sira mós fó atendimentu nafatin ba komunidade ne’ebé mak hetan asu tata, sira mós hetan tratamentu di’ak no vasinasaun husi pesoál saúde sira iha fasilidade saúde, nune’e atu prevene moras rabies ne’e,” nia katak.
Xefe suku Naimeko, Marcos Liu Abi, konsidera kooperasaun ne’e importante, nune’e bele partilla informasaun ba komunidade sira, oinsá bele prevene aan husi moras rabies.
“Ami hanesan autoridade lokál, ami prontu atu kolabora ho Estadu liuliu parte asuntu saúde nian, tanba iha Oé-Cusse, akontese moras rabies nian númeru sa’e bebeik, tan ne’e programa ida-ne’e iha apoia atu serbisu hamutuk, nune’e ita bele prevene, liuhusi fahe informasaun ba komunidade iha baze kona-bá maneira saida mak atu salva aan husi moras ne’e.”
Notísia relevante: Vítima 29 ne´ebé asu tata iha Pasabe-Oésilo simu ona vasina Rabies
Jornalista: Abílio Elo Nini
Editór: Evaristo Soares Martins
