OÉ-CUSSE, 11 juñu 2024 (TATOLI) – Ministériu Edukasaun (ME) fasilita formasaun dirijente profesór hamutuk na’in-103mai husi Ensinu Báziku iha Rejiaun Administrativa Espesiál Oé-Cusse Ambeno (RAEOA) kona-bá programa Apoia Lideransa Mentoria Aprendizajen (ALMA), hodi hadi’a kualidade edukasaun.
“Programa ne’e atu kapasita profesór sira, husi koordenadór eskola, diretór ho ajuntu sira, atubele estabelese iha kada eskola liuhusi tableta nune’e bele la’o tuir programa ne’ebé iha ona,” Diretora Nasionál Ensinu Báziku hosi Ministériu Edukasaun, Estelita Soares, ko’alia iha otél Ambeno, tersa ne’e.
Notísia relevante: RAEOA no CARE lansa programa empresta livru ‘hadomi lee’ iha EBF Ulas
Nia informa, formasaun lihga mós ho Informasaun Komunikasaun Téknolojia (ICT, sigla portugés) nian, tanba iha 2015-2016, implementa ona iha munisípiu 10 no iha 2024 ne’e implementa ba munisípiu tolu Ainaro, Ermera no RAEOA.
“Ita halo formasaun loron haat, materiál espesífika oinsá mak sira uza tableta tanba ita distribui ona ba sira, oinsá mak ita-nia matéria observasaun saladeaula, iha hotu tableta nia laran, liga JTP no JTL, agora ita hein de’it halo formasaun de’it oinsá mak sira bele halo grupu, oinsá líder sira atu akompañia ho manorin feto potensiál, inspetór eskolár no mentór lokál sira, atu observasaun saladeaula ba ita-nia manorin sira,” nia katak.
Sekretária Rejionál ba Asuntu Edukasaun no Solidariedade Sosiál, Inácia Tamele, agradese tanba liuhusi programa ALMA ne’e bele enkoraja líder sira, atu hahú ona utíliza tableta hodi hafasil liña komunikasaun entre RAEOA ho nasionál.
“Sei lori vantajen boot tebes ba iha área edukasaun, ha’u fiar katak liuhusi programa ALMA sei hafasil líder eskola sira, liuhusi tableta ne’ebé utíliza sistema dijitalizasaun ba halo observasaun ba manorin sira iha prosesu aprendizajen iha saladeaula,” nia orgullu.
Iha parte seluk mós, líder eskola mós bele halo avaliasaun dezempeñu ba profesór sira, liuhusi dijitalizasaun, no sei prepara manorin sira di’akliu no líder sira sei fó ezemplu ba profesór sira, atu hanorin tuir kurríkulu ensinu báziku siklu primeiru ho daruak, ne’ebé daudaun dezenvolve ona.
Formandu Tibertio Sasi nu’udar Koordenadór EBF Bausiu iha sub-rejiaun Pante Makasar, , agradese ba Ministériu Edukasaun bele fasilita formasaun ba programa ALMA, nune’e bele hasa’e kualidade edukasaun husi nível ensinu báziku.
“Ohin ne’e hanesan loron daruak, ami sente katak, programa ida-ne’e kapaas, espera bele la’o nafatin ba oin, atu ita bele implementa iha eskola sira, ne’ebé ami tuir formasaun ba tableta sira ne’e ami sente iha mudansa, katak ami bele adapta balun, durante ne’e ami nunka kaer, maibé ohin bele ba oin bele ona,” nia orgullu.
Notísia relevante: Funsionáriu 23 iha edukasaun Oé-Cusse rekere atu reforma
Entretantu, implementasaun programa Apoia Lideransa Mentoria Aprendizajen ne’e hetan apoia orsamentu mai husi Governu Autrália liuhusi Department of Foreign Affairs and Trade (DFAT) no Partnership Human Development (PHD) no mós husi banku mundiál husi projetu Basic Education Strengthening Tranformation (BEST).
Jornalista: Abílio Elo Nini
Editór: Evaristo Soares Martins
