Funsionáriu 23 iha edukasaun Oé-Cusse rekere atu reforma
OÉ-CUSSE, 05 dezembru 2023 (TATOLI) – Funsionáriu na’in-23 ne’ebé hala’o kna’ar iha Diresaun Rejionál Edukasaun RAEOA, rekere ona naran iha Departementu Rekursu Umanu atu reforma iha 2024 tanba idade liu ona 60.
Xefe Departamentu Rekursu Umanu iha Sekretaria Rejionál ba Asuntu Edukasaun no Solidariedade Sosiál, João Evaristo Bobo, funsionáriu na’in-23 ne’e rejistra ona naran iha servisu edukasaun munisipál maibé sei presiza aprezenta rekerimentu ba Komisaun Funsaun Públika (KFP) hodi hetan despaxu sertifikasaun reforma.
“Agora lista naran iha tinan 2023 ne’e, sira-ne’ebé idade 60 ne’e, ami simu ona na’in-23, atu reforma iha tinan 2024 oin mai,” João Evaristo Bobo, ba jornalista sira iha Oé-Cusse, tersa ne’e.
Notísia relevante: Governu la konklui aprova estatutu funsionáriu públiku ba reforma obrigatóriu
Tuir xefe departementu ne’e, katak maske idade tama ona 60 ba leten, bainhira hakarak reforma, depende ba funsionáriu tenke aprezenta rekerimentu ba Komisaun Funsaun Públika hodi prosesa.
“Ita rejista ona maibé sira tenke hato’o rekerimentu kada pesoál katak, prontu atu reforma ona, rekerimentu ne’e sei submete ba Komisaun Funsaun Públika, hodi hatún despaxu bele reforma, maibé kuandu na’in seidauk halo rekerimentu, ita lebele obriga, tanba lei refroma seidauk hatún mai iha munisipíu atu implementa,” João Bobo, fó hanoin.
Xefe Departementu ne’e, hateten, profesór barak iha Oé-Cusse idade tama ona 65 maibé lei atu fó Diresaun edukasaun munisipál kona-bá reforma obrigatóriu lei seidauk fó, maibé ida-ne’e hakarak halo reforma nia tenke halo rekerimentu.
“Rekerimentu ita simu iha 2023 ne’e, foin ema na’in-10 sira reforma ona, agora hela na’in-tolu atu ba asina tanba modelu primeiru no segundu no seguransa sosiál iha nasionál,” nia afirma.
Notísia relevante:Komisaun A sei fó prioridade diskute lei reforma obrigatóriu ba FP
Jornalista: Abílio Elo Nini
Editór: Evaristo Soares Martins
