DILI, 16 juñu 2023 (TATOLI) – Ministru Prezidénsia Konsellu Ministru Fidelis Leite Magalhães, hateten VIII Governu la konsege aprova Dekretu-Lei númeru 69/2022 kona-ba estatutu funsionáriu públiku reforma obrigatóriu.
“Kona-ba proposta dekretu-lei númeru 69/2022, estatutu ba funsionáriu sira reforma obrgatóriu ho tinan 60. Infelizmente esbozu prontu hotu tiha ona iha Konsellu Ministru. Parlamentu mós fó ona autorizasaun. Ha’u rasik ba husu autorizasaun, soké ninian aprovasaun ba Dekretu-Lei ne’e mak koinside ba epoka eleisaun nian”, Fidelis Leite Magalhães dehan bainhira partisipa serimónia despedida reforma membru PNTL 158 ne’ebé mak halo iha Sentru Formasaun Polísia (CFP, siglpa portugés) Comoro, sesta ne’e.
Tanba ne’e, VIII Governu propoin de’it ba Governu foun mai atu tau atensaun no konsiderasaun ba dekretu-lei ne’e.
“Dekretu-lei hirak ne’e tama iha rekomendasaun no relatóriu ne’ebé mak ita sei hato’o ba Governu mai. Espera ita-nia propgrama Governu ne’ebé tuir mai atu tau asuntu sira ne’e ho sériu”, nia konklui.
Jornalista: Natalino Costa
Editór : Zezito Silva
