RAEOA no CARE lansa programa empresta livru ‘hadomi lee’ iha EBF Ulas
OÉ-CUSSE, 31 maiu 2024 (TATOLI) – Sekretária Rejionál ba Asuntu Edukasaun no Solidaiedade Sosiál, Inácia Tamele, hamutuk ho parseiru CARE Internasionál liuhusi programa, Ai-han atu Hadi’a Nutrisaun no Edukasuan (HATUTAN), sesta ne’e, lansa programa rai no empresta livru ba estudante sira atu lori ba uma hodi hasa’e abilidade hadomi lee, tanba lee hanesan janela ba mundu.
Seremónia lansamentu programa ne’e, realiza iha Eskola Bázika Filiál (EBF) Ulas suku Taiboko sub-rejiaun Pante Makasar, Rejiaun Administrativa Espesiál Oé-Cusse Amebno (RAEOA).
“Ohin loron istória ida, tanba selebra abilidade lee no fó impresta livru ba estudante no inan-aman sira atu hadomi lee, tanba kualidade edukasaun la signifika katak, atu aprende iha sala laran de’it, maibé atu di’akliu ne’e, tenki lee, tanba lee la’os ba disiplina sira de’it, maibé tenke lee istória sira seluk mós, kuandu lee barak ita iha koñesimentu barak, lee mak hanesan janela ba mundu,” Inácia Tamele, ko’alia iha EBF Ulas.
Notísia relevante: Prezidénsia Repúblika-CARE asina akordu hadi’a edukasaun infantil-nutrisaun labarik
Dirijente eduksaun Oé-Cusse ne’e, fó hanoin ba inan-aman, autoridade lokál sira atu apoia oan sira-bele kontinua estudu bainhira fila husi eskola, nune’e bele aumenta koñesimentu abilidade lee.
Tanba tempu ba prosesu aprendizajén formál iha sala laran, kuaze oras balu de’it no la sufisiénte, tan ne’e liuhusi programa impresta livru lori ba uma, elunu sira jere tempu iha oras meiudia, loraik to’o kalan, bele estuda.
“Inan-aman sira-ne’ebé hatene lee no hakerek bele apoia oan sira iha uma atu estuda tanba iha sala laran labarik sira sei la kobre hotu atividade sira, tanba edukasaun báziku primeiru ne’e, mai husi inan-aman autoridade lokál sira-nia apoia ba iha eskola importante tebes,” nia apela.
Xefe Programa Edukasaun no Nutrisaun HATUTAN, Nicole Seibel, informa, programa ne’e hetan apoia fundu finánsiamentu husi Governu Americanu, hodi serbisu hamutuk ho Autoridade RAEOA, atu hametin labarik nia abilidade lee no prátika di’ak ba saúde, ijíene, nutrisaun iha eskola no iha uma.
“Ohin, ita selebra hadomi lee, ho aumentu livru ba eskola, la’os ba eskola atu tau iha eskola de’it maibé impresta ba alunu sira lori ba uma no lee iha uma, tan ne’e ha’u apelu ba inan-aman sira, atensaun ba oan sira-nia lee iha uma,” nia informa.
Tanba tuir fonte peskiza dadús hatudu, labarik nia abilidade lee aprende di’akliu, baihira sira prátika lee iha uma la’os iha eskola de’it, entaun ho parséria kolaborasaun serbisu hamutuk, inan-aman ho manorin sira mak fó bantajén, entaun ne’e fó baze ba labarik sira-nia futuru atu aprende iha vida tomak la para ho eskola, maibé ho hábitua lee bele estuda no aprende nafatin.
Iha biban ne’e, Koordenadór EBF Ulas, Celestinho Marques Quini, sente orgullu, no promete sei utíliza livru sira-ne’e ba estudante sira atu lee no impresta lori ba uma hodi lee.
“Lansamentu livru iha ha’u-nia eskola, senti kontenti, tan ne’e livru ne’ebé ohin ami simu, ami tenki uza ho kuidadu atu livru sira-ne’e labele nakles árbiru de’it, maib’e utíl ba estudante sira atu lee, no ami tanba liuhusi lee sira-bele matenek iha futuru mai,” nia agradese.
Notísia relevante:Programa merenda eskolár iha Oé-Cusse sei iha faze elaborasaun
Entretantu, programa empresta livru hadomi lee, CARE HATUTAN sei aplika tán ba eskola 47, komposta husi Ensinu Bázika Filiál 43 no Ensinu Pré-Eskolár (EPE) haat mai husi sub-rejiaun Pante Makasar, Oésilo Pássabe no Nítibe.
Jornalista: Abílio Elo Nini
Editór: Evaristo Soares Martins
