DILI, 12 juñu 2024 (TATOLI)—Reprezentante povu iha uma fukun Parlamentu Nasionál (PN) hein Ministériu Edukasaun (ME) bele tau imporánsi ka tau konsiderasaun ba rezolusaun PN hodi solusiona problema antigu profesór kontratadu sira.
Notísia Relevante: PN aprova rezolusaun rekomenda Governu valoriza profesór timoroan
Prezidente Komisaun G ne’ebé trata asuntu Edukasaun, Juventude, Kultura no Sidadania iha PN, Armando Lopes, hateten mezmu iha informasaun ME hato’o ona iha mídia kona-ba rezolusaun PN kontra dekretu-lei tolu ne’ebé vijente hela.
“Maibé, hanesan reprezentante povu iha PN to’o agora seida’uk iha informasaun katak iha ona desizaun ida-ne’e kontra no labele kontinua ne’e seidauk. Bainhira mai ona iha PN, Deputadu sira sei levanta,” nia hateten ba jornalista sira iha resintu Parlamentu Nasionál, kuarta ne’e.
Prezidente Komisaun G ne’e hateten, rezolusaun ne’e rezultadu husi plenária iha Parlamentu Nasionál (PN) no rezolusaun ne’e Deputadu sira-ne’ebé reprezenta povu mak foti.
“Tan ida-ne’e, hanoin rezolusaun ne’e la’o ona no ami entrega ona ba Governu. Depois, rezultadu saida mak atu mosu mai hafoin mak ami ko’alia,” nia dehan.
Deputada FRETILIN, Maria Angelica Rangel, hakarak hatene rezolusaun ne’ebé Parlamentu Nasionál (PN) aprova ninia prosesu oinsá ona.
Governu konsidera rezolusaun PN
Vise Ministru ba asuntu Parlamentár, Adérito Hugo da Costa, hateten Governu dezde inísiu mai halo avaliasaun ba dekretu-lei tolu kona-ba ingresu espesiál ho rekezitu sira ba rekrutamentu foun.
Nia dehan, kaer ba dekretu-lei tolu ne’ebé Governu anteriór uza hela, Governu liuhusi Ministériu Edukasaun (ME) halo avaliasaun haree medida ne’ebé introdús iha dekretu-lei tolu hanesan dekretu-lei númeru 31, 32, 34, guia ME atu atinje meta ida kualidade edukasaun, entaun la halo alterasaun ba dekretu-lei tolu ne’e no lori guia ME halo prosesu to’o ohin loron.
“Rezolusaun PN mai, la’ós la konsidera maibé konsidera nafatin aspirasaun reprezenta povu, maibé Governu adianta ona serbisu lubun dezde besik fulan 10 tama iha governasaun liuliu ME ka’er hela rejime sira-ne’e halo implementasaun,” nia dehan.
Entaun, Goveranante ne’e dehan, ho rezolusaun PN iha pontu tolu ba medida sira foun ne’ebé atu introdús mak resposta ne’ebé parte ME halo ne’e katak, rezolusaun ne’e se implementa sei obriga ME atu halo reajustamentu ba dekretu-lei tolu ne’ebé iha prátika fulan 10-resin ida ikus ne’e.
ME uza termu sira-ne’ebé dekretu-lei tolu ne’e mak guia sira hodi foti desizaun sira jere rekrutamentu faze dahuluk hotu ona iha manorin na’in 400-resin mak distribui ona ba eskola sira-ne’ebé menus ba manorin.
Agora, tama ona ba faze daruak rekrutamentu hahú ona iha semana kotuk no sei kontinua faze tuir mai hodi prienxe kuoata manorin ne’ebé ME haree númeru ida sufisiente atu kobre eskola sira iha territóriu.
Rekrutamentu ne’e ho envolvimentu husi Komisaun Funsaun Públika (KFP), aleinde ingresu espesiál iha manorin sira simu pose hotu ona iha territóriu nasionál.
Entaun, nia dehan, ho rezolusaun ne’ebé mosu iha dalan klaran susar atu halo imediatamente implementa, maibé aspirasaun deputadu sira-nian transforma ba rezolusaun ne’e Governu fó nafatin atensaun.
Maibé, atu halo alterasaun ka mudansa ida diretamente tanba termu ne’ebé define iha rezolusaun ne’e mós nafatin husu Governu atu kontinua halo rekrutamentu ho prosesu ne’ebé la’o, kontinua halo avaliasaun ba antigun profesór kontratadu sira.
“Antigu profesór (kontratadu) sira iha faze dahuluk rekrutamentu husi númeru 400-resin ne’ebé pasa ne’e, iha manorin na’in-50 mak tama iha ne’e,” nia hateten.
Antes ne’e, iha 27 maiu 2024, PN liuhusi reuniaun plenária aprova projetu rezolusaun númeru 38/VI(1a) no rekomenda ba Governu atu solusiona kestaun profesór kontratadu ho rezultadu votasaun unanimidade a-favór 59, kontra 0 no abstensaun 0.
Iha rezolusaun ne’e mak rekomenda pontu rua mak hanesan; Dahuluk, husu Governu atu prosede realiza avaliasaun dezempeñu ba eis profesór sira hotu, prosede avaliasaun dezempeñu ba eis manorin hotu no reklamente.
Kontinua envidar esforsu hotu hodi prosede kontratasaun profesór hirak ne’e, iha kazu hetan ona rezultadu di’ak iha avaliasaun, instrui ba profesór sira-ne’e kontinua konkore iha kursu oioin rekrutamentu ho bolsa kandidatu.
Daruak, deklara apoiu ba prosesu rekrutamentu, por méritu, inisia husi Ministériu Edukasaun ho Komisaun Funsaun Públika (KFP).
Proponente aprezenta projetu rezolusaun ne’e mai Deputadu Gabriel Soares, Firminio Taequi, Mateus da Cruz (CNRT), Armando dos Santos Lopes, Manuel Henrique Noronha (PD), Mariquita Soares (FRETILIN).
Notísia Relevante: ME konsidera Rezolusaun PN viola dekretu-lei tolu
Jornalista : Nelson de Sousa
Editór : Cancio Ximenes