iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade orienta IGE loke bee-dalan ba natar ektare 40 iha Lifau

Autoridade orienta IGE loke bee-dalan ba natar ektare 40 iha Lifau

IGE fasilita loke bee-dalan atu fasilita natar ektare 40-resin iha suku Lifau sub-rejiaun Pante Makasar. Imajen Tatoli/Abílio Elo Nini

OÉ-CUSSE, 13 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretária Rejionál ba Asuntu Agrikultura, Floresta no Pekuária serbisu hamutuk ho Asesór Asuntu Sosiál, orienta Institutu Jestaun Ekipamentu (IGE, sigla portugés), kinta ne’e loke bee-dalan atu fasilita natar ektare 40 iha suku Lifau, sub-rejiaun Pante Makasar.

“Ohin ha’u mai iha-ne’e, tanba Agrikultura servisu hamutuk ho asesór prinsipál Asuntu Sosiál, atu atende pedidu husi komunidade natar na’in-sira husi suku lifau ne’ebé sira hato’o pedidu iha semana kotuk atu normaliza fila-fali mini-irrigasaun atu fornese bee ba natar sira, hanesan kaktua-ana, Usapi-Ana no natar Kaimeo,” Sekretária Rejionál ba Asuntu Agrikultura, Floresta no Pekuária, Filomena Sila, hateten.

Notísia relevante: Natar ektare 204 estragu iha Oé-Cusse, Autoridade sei orienta empreza rekonstrui gabiaun

Membru Autoridade ne’e espera ho apoia loke bee-dalan ne’e, sei tulun agrikultór sira bele halai natar ona, hafoin abandona tinan ida.

“Espera katak, be’e ne’ebe ohin ekipa IGE loke no kanaliza bele fó rezultadu di’ak ba ita-nia komunidade natar na’in-sira iha suku Lifau,” nia haktuir.

Asesór Prinsipál Asuntu Sosiál, Agustino Caet, dehan, atividade hanesan serbisu sosiál, tanba iha tempu udan hetan estragu entaun afeta natar na’in-sira husi suku lifau.

“Tanba ne’e liuhosi xefe suku Lifau, hato’o pedidu ba parte agrikultura, horiksehik kedas, ami mai observa fatin ida-ne’e, depois ha’u koordena ho Obra Públika, orienta parte IGE, lori ekipamentu pezada sira, ohin normaliza ona mini irrigasaun ne’e,” nia afirma.

Xefe suku Lifau, Delfino Sole, informa, agradese tanba pedidu ne’e hato’o husi natar na’in sira, liuhusi autoridade lokál sira iha suku Lifau no konsege responde ho imediata.

“Espera ba oin Governu tau matan beibeik mai ami tanba ami hamutuk ho natar na’in-sira laiha forsa oinsá loke bee dalan atu tama natar sira, kuandu ami ke’e de’it ami-nia forsa lato’o, tán ne’e ami agradese ba Autoridade, bele apoia ekipamentu sira-ne’e ami loke ona atubele halai natar,” nia orgullu.

Notísia relevante: Agrikultór Cunha no Lalisuk iha Oé-Cusse hahú halai natar époka 2023

Entretantu, natar ektare 40 ne’e mai husi natar na’in-sira hamutuk uma-kain 157.

Jornalista     : Abílio Elo Nini

Editór             : Evaristo Soares Martins

iklan
iklan

Leave a Reply

iklan
error: Content is protected !!