OÉ-CUSS,E 14 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretária Rejionál ba Asuntu Agrikultura, Floresta no Pekuária serbisu hamutuk ho Asesór Asuntu Sosiál Prezidente Autoridade, normaliza ona irrigasaun atu fasilita bee natar ektare 40 iha suku Lifau, sub-rejiaun Pante Makasar atubele halai natar iha fulan ne’e.
Tomas Oqui nu’udar natar na’in, agradese tanba bele apoia ona ekipamentu atu hadi’a irrigasaun ne’ebé antes ne’e hetan estragu iha tempu udan.
Nia hateten, natar ektare 40 iha pertense suku Lifau la abondona, kada tinan halai nafatin, maibé irrigasaun ne’e la’ós permanente tanba bee hatama husi mota, entaun to’o tempu udan hetan estragu.
“Agora nia tempu atu halai mak fulan ida-ne’e, tinan sira uluk, kuandu laiha apoia, ami hamutuk osan kada família ida $10, bainbain ami aluga eskavadór husi kompañia balu selu $700 mak ba dudu atu bee dalan tama natar sira,” Tomas Oqui ba Ajéncia Tatoli iha Oé-Cusse.
Notísia relevante: Autoridade orienta IGE loke bee-dalan ba natar ektare 40 iha Lifau
Sentimentu ksolok ne’e hanesan mós natar na’in, Luiza Da Costa, agradese tanba pedidu husu apoia ba iha Autoridade konsege responde ho rezultadu halo natar na’in-sira kontente.
“Ha’u hanesan natar na’in, sente kontente, tanba serbisu Agrikultura ajuda ona ami lori eskavadór mai hadi’a ami-nia irrigasaun iha horisehik, no ohin bee komesa tama ona ba natar sira, entaun iha semana oin hanesan ne’e ami hahu halai natar ona,” nia orgullu.
Sekretária Rejionál ba Asuntu Agrikultura, Filomena Sila, enkoraja natar na’in-sira, utiliza bee tama ona ba natar sira, persiza kanaliza didi’ak atu nunee bele hasae produsaun hare iha tinan ne’e.
“Imi-nia pedidu hato’o mai ami, responde ona, horisehik ami mai ho ekipamentu, ohin ita hotu haree rezultadu hatudu daudaun, agora saida mak persiza halo ba oin, husu natar na’in presiza uza didi’ak bee ida-ne’e la bele estraga, maibé uza atu halai natar nune’e bele produs hare ho di’ak, atu aumenta produsaun ita nia rejiaun Oé-Cusse, ida-ne’e ita-nia hakarak atu apoia,”nia fó hanoin.
Notísia relevante:Autoridade RAEOA aloka rihun $105-resin harii irrigasaun rua iha suku Lalisuk
Atu rekorda fali katak, iha loron kinta 13 juñu 2024, Autoridade RAEOA liuhusi Sekretária Rejionál ba Asuntu Agrikultura, Floresta no Pekuária serbisu hamutuk ho Asesór Asuntu Sosiál, orienta Institutu Jestaun Ekipamentu (IGE, sigla portugés), loke bee-dalan atu fasilita natar ektare 40 iha suku Lifau mai husi natar na’in-sira hamutuk uma-kain 157.
Jornalista: Abílio Elo Nini
Editór: Evaristo Soares Martins
