DILI, 14 juñu 2024 (TATOLI)—Diresaun Nasionál Infraestrutura no Komunikasaun (DNIK) daudaun ne’e presiza rekursu umanu hahú husi nasionál to’o munisípiu hodi reforsa serbisu instituisaun tanba kada tinan serbisu sempre aumenta.
“Ita-nia rekursu umanu ne’ebé daudaun iha hamutuk 54, permanente 20-resin no restu kontratadu hotu,” Diretór Nasionál Infraestrutura no Komunikasaun, Ambrosio Amaral, informa, liuhusi programa entrevista eskluziva Agência Tatoli, iha estúdiu Farol, sesta ne’e.
Daudaun DNIK nia rekursu umanu iha kada munisípiu iha ema na’in-ida, nune’e iha ona planu tinan oin sei halo rekrutamentu ema 25 hodi reforsa serbisu iha munisípiu sira.
Nia dehan, serbisu DNIK iha nasionál no munisípiu ne’e importante tanba daudaun kabu submarinu fibra ótika ligadaun internasionál iha dalan, automátikamente bainhira to’o mai no prosesu sira la’o di’ak hotu, tenke iha ema hodi halo serbisu.
Iha sorin seluk, Diresaun ne’e fasilita ona infraestrutura rede internet ba instituisaun 559.
“Tinan ne’e ita kontinua dezenvolve tan rede infraestrutura ba postu administrativu sira iha territóriu laran ne’ebé sei konekta ba eskola públika no sentru saúde hotu iha territóriu, ida-ne’e mak konekta hotu, sei iha ajénsia 1.000-resin mak konektada ba infraestrutura rede,” nia relata.
Notísia relevante : DNIK fasilita ona infraestrutura rede internet ba instituisaun Estadu 559
Hanesan rede integradu, bainhira sistema internet kabu submarinu to’o mai, DNIK mós husi data center sei dada direita fiu fibra ótika husi loading point iha Bebonuk. Bainhira kabu submarinu konekta automáktikamente ajénsia sira-ne’ebé durante konekta mai data center DNIK nian sei hetan internet ne’ebé di’ak liuhusi kabu submarinu fibra ótika.
Kabu submarinu ne’e hanesan própriu investimentu Governu nian, enkuantu DNIK prepara backbonenasionál ne’ebé iha IV Governu nia tempu projetu eletrisidade torre boot sira haleu Timor ne’e iha ne’ebá dada tiha ona fiu fibra ótika haleu Timor purvota kilómetru 609.
“DNIK nia serbisu iha Projetu Nasionál Konektivitidade (PNK) sira ami prevee hela ba distritál, entaun nia kapitál munisípiu sira ne’e kada munisípiu iha ona backbone munisipál haleu,” nia esplika.
Sira ne’e la’o tanba DNIK serbisu bazeia ba lei orgánika MTK iha númeru 25/2023 15 setembru artigu 17 ne’ebé ko’alia responsabilidade no dever tomak DNIK nian, liu-liu pontu ruma importante mak halo koneksaun infraestrutura rede fibra ótika ba ajénsia Governu hotu iha Timor-Leste sai hanesan jestór ba distribuisaun banda larga (bandwidth) ba ajénsia Governu iha territóriu.
Tanba ne’e, hafoin finaliza PNK VII nian, DNIK konekta ona ba ajénsia 440 iha territóriu no halo migrasaun serbisu entre ajénsia sira ne’ebé durante ne’e tutela nia hosting sistema sira ne’e iha Ajénsia TIC Timor hamutuk 159, ne’ebé sira-nia sistema dadus rai iha Ajénsia TIC Timor nian.
Jornalista : Arminda Fonseca
Editora : Julia Chatarina
