OÉ-CUSSE, 14 juñu 2024 (TATOLI) – Ministériu Edukasaun (ME), akompaña husi Autoridade Rejiaun Administrativa Espesiál Oé-Cusse Ambeno (RAEOA) sesta ne’e, lansa programa Apoia Lideransa Mentoria Aprendizajen (ALMA), ho objetivu atu hasa’e prestasaun serbisu ba lideransa eskola sira hodi hadi’a kualidade edukasaun.
“Governu priodade ba programa ne’e, atu ajuda profesór sira-nia dezempeñu no estudante sira liuliu iha prosesu aprendizajen, oinsá mak sira bele ajuda líder eskola sira, diretór, adjuntu, gabinete apoia tékniku no profesór sira, atubele hala’o sira-nia kna’ar ho di’ak liután no ajuda halo observasaun saladeaula no jestaun eskolár,” Ministra Edukasaun, Dulce de Jesus Soares, ko’alia iha eskola EFB 28 Agostu Oé-Cusse.
Notísia relevante: ME kapasita profesór 103 ba programa ALMA iha Oé-Cusse
Iha ámbitu lansamentu programa ALMA, Ministériu Edukasaun mós oferrse tableta ba mentór sira atu fasilita bainhiraa halo observasasaun iha saladeaula, no bele halo gravasaun no aprezenta, iha enkontru konjunta nível eskola, bele sai matéria, atu diskute ho profesór sira, kona-bá lala’ok prosesu aprendizajen.
“Ida-ne’e atu ajuda profesór sira bele halo avaliasaun di’ak ba estudante sira-nia dezempeñu, nune’e líder eskola, atubele jere sira-nia eskola ho di’akliu,” nia fó hanoin.
Sekretária Rejionál ba Asuntu Edukasaun no Solidariedade Sosiál, Inácia Tamele, agradese tanba objetivu ne’e atu promove hakbiit no hadi’a kualidade edukasaun liuhusi formasaun, monitorizasaun ba líder eskola sira, empodera manorin feto potensiál sira iha saladeaula, enkoraja edukasaun inkluziva no prátika sentraliza aprendizajen ba estudante sira.
Daruak, oinsá bele utiliza teknolojia liuhusi tableta atubele halo observasaun ba profesór sira, no halo avaliasaun dezempeñu ba profesór sira, ikusliu, programa ALMA bele kria konversa koletiva entre eskola sira, profesór ho diretór sira iha RAEOA no nasionál.
“Ba oin sei estabelese grupu tékniku traballu ida, husi diretór sira, xefe departamentu iha serbisu edukasaun, no sei husu atu hetan ema ida sai pontu fokál iha Gabinete Prezidente Autoridade, nune’e husi instituisaun rua ne’e, bele haforsa mekanizmu no sistema serbisu iha RAEOA,” nia orgullu.
Notísia relevante: Garante kualidade edukasaun, ME ho Embaixadór Austrália lansa programa ALMA iha Uatucarbau
Embaxadór Boa Vontade, Kristy Sword Gusmão, konsidera, programa ALMA ligasau ho métodu numerasia no literasia, tanba programa ne’e nia objetivu prinsipál mak atu halo mudansa, presiza hadi’a rezultadu aprendizajen ba labarik sira iha saladeaula liuhusi apoia ba líder eskola.
Tuir nia, la’ós fasil sai líder eskola, tanba tenke jere rekursu umanu, jere rekursu didátiku, tenke haree problema infraestrutura eskola, no halo relasaun no komunikasaun di’ak ho komunidade sira, nune’e mós iha papél importante ida atu sai mós ezemplu di’ak ba manorin sira.
“Ha’u iha esperansa boot katak, ho implementasaun programa ALMA ne’e iha eskola sira iha Oé-Cusse, sei fó impaktu no fó benefísiu boot tebes ba alunu sira, no ha’u promete sei mai vizita dalabarak, saida mak rezultadu konkretu sira-ne’ebé sai husi programa ALMA ninia implementasaun,” nia katak.
Notísia relevante: Programa ALMA atu hadi’a kualidade edukasaun iha Timor-Leste
Implementasaun programa Apoia Lideransa Mentoria Aprendizajen ne’e hetan apoia orsamentu mai husi parseriu Governu Austrália liuhusi Depertment of Foreign Affairs and Trade (DFAT) no Partnership Human Development (PHD) no mós husi banku mundiál liuhusi projetu Basic Education Strengthening Tranformation (BEST).
Jornalista : Abílio Elo Nini
Editór : Evaristo Soares Martins
