iklan

EDUKASAUN, HEADLINE, MUNISÍPIU, OÉ-CUSSE (RAEOA)

RAEOA relata problema tolu ba ME tau prioridade iha PAA 2025

RAEOA relata problema tolu ba ME tau prioridade iha PAA 2025

Sekretária Rejionál ba Asuntu Edukasaun no Solidariedade Sosiál, Inácia Tamele. Imajen Tatoli/Abílio Elo Nini.

OÉ-CUSSE, 14 juñu 2024 (TATOLI) – Autoridade Rejiaun Administrativa Espsiál Oé-Cusse Ambeno (RAEOA), liuhusi Sekretáriu Rejionál Edukasaun no Asuntu Sosiál, relata problema tolu ba Ministériu Edukasaun atu fó prioridade ba iha Planu Asaun Anuál (PAA) 2025.

Notísia relevante: Ministériu Edukasaun lansa programa ALMA iha Oé-Cusse

Sekretária Rejionál Edukasaun no Asuntu Sosiál, Inácia Tamele, propoin problema tolu ba iha ámbitu lansamentu Programa Apoia Lideransa Mentoria Aprendizajen (ALMA) iha Ensinu Bázika Filiál (EBF) 28 Agostu Oé-Cusse, sesta ne’e.

“Rekomendasaun primeiru ami hakarak halo uma ba profesór sira, halo reabilitasaun, aumenta saladeaula, halo lutu haleu eskola sira, bee-moos no sanitasaun, daruak, sei bele eskola privada Katólika sira mós entegra ba programa ALMA, terseiru ami atu apoia ami, atu halo peskiza hodi haree eskola barak ne’ebé mak agora ameasadu, tanba edukasaun ladún barak, hirak-ne’e akontese tanba harii eskola iha suku ida dalaruma rua to’o tolu,” nia propoin.

Membru Autoridade ba Asuntu Edukasuan ne’e, informa mós, atu garante kualidade edukasaun ba eskola sira, presiza fasilita kapasitasaun ba manorin sira, nune’e bele hasa’e abilidade manorin sira.

“Ami-nia rekomendasaun ne’e ba Ministeriu Edukasaun, atubele konsidera iha ami-nia Planu Asaun Anuál (PAA) 2025, planu ne’e bele aprova, espera labele ko’a, tanba ami iha planu barak hodi fornese formasaun kontinua tanba realidade hatudu ona, presiza kapasitasaun ba manorin sira,” nia rekomenda.

Ministra Edukasaun, Dulce de Jesus, informa, iha fulan jullu to’o agostu, sei iha kolokasaun profesór foun balu mai Oé-Cusse, maibé la’ós signifika eskola hotu sei hetan profesór barak, maibé iha Ministériu Edukasaun sei fasilita formasaun liuhusi INFORDEPE ba programa multiseria.

“Iha tempu badak sei halo formasaun kona-bá multiseria, ezemplu iha saladeaula, primeiru-anu iha labarik na’in-10 de’it, hanesan rekomenadasaun ohin,  katak loke eskola iha fatin barak, entaun akontese eskola balu númeru alunu menus, ne’ebé rekomendasaun sira-ne’e iha sei haree tanba ita hakarak lori edukasaun ba ema hotu,” nia katak.

Notísia relevante: Matéria lima iha ESG Baqui Oé-Cusse laiha profesór

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!