iklan

EDUKASAUN, HEADLINE, MUNISÍPIU, OÉ-CUSSE (RAEOA)

Matéria lima iha ESG Baqui Oé-Cusse laiha profesór

Matéria lima iha ESG Baqui Oé-Cusse laiha profesór

Ambiente Ensinu Sekundáriu Jerál Baqui, ne’ebé lokaliza iha suku Naimeco, sub-rejiaun Pante Makasar, Rejiaun Administrativa Espesiál Oé-Cusse (RAEOA) Imajen Tatoli/Abílio Elo Nini.

OÉ-CUSSE, 12 juñu 2024 (TATOLI) – Ensinu Sekundária Jerál (ESG, sigla portugés) Baqui liderada Rina Rampin Anunu, enfrenta preokupasaun menus profesór tanba eskola ne’ebé lokaliza iha suku Naimeco, sub-rejiaun Pante Makasar, Rejiaun Administrativa Espesiál Oé-Cusse (RAEOA) ne’e laiha profesór ba matéria lima kedas.

Diretora Eskola, relembra, uluk disiplina relijiaun ema ida de’it mak kobre hotu primeiru to’o terseiru-anu, maibé foin daudaun husi parte edukasaun muda fali ona atu ba hanorin iha eskola privada sira.

“Uluk iha na’in-48 maibé tama ba transferénsia entaun profesora ne’e hela 26 de’it, ha’u tenke hanorin, ha’u mós sai profesór da turma no responsável ba eskola, agora menus afeta abandona estudante sira tanba sei tinan ne’e profesór la kompletu entaun nia impaktu ba ezame nasionál, tanba profesór hanorin mós agora rungu-ranga, abandona iha sala, balu la tama tanba disiplina balu laiha, hanesan ESG Baqui laiha duni hanesan geografia, língua malaiu, sidadania, relijiaun ho fízika,” Rina Rampin Anunu, ko’alia iha Baqui, tersa ne’e.

Notísia relevante: Profesór bolsa kandidatu na’in-31 kolokadu ona iha Oé-Cusse

Diretora Eskola ne’e, hateten, atu solusiona problema ne’e, profesór sira ho voluntariamente atu hanorin hotu ba disiplina lima ne’e, maske la’ós sira-nia kursu espesialidade.

Diretora ESG Baqui, Rina Rampin Anunu. Imajen Tatoli/Abílio Elo Nini.

“Ami agora ne’e, ajuda malu maske la’ós ami-nia espesialidade, maibé ajuda malu atubele fasilita ita-nia alunu sira, liuliu ba terseiru-anu tanba prepara ba ezame nasionál, ne’ebé ami husu ba parte edukasaun bele tau atensaun ba problema ida-ne’e,” nia rekomenda.

Antes ne’e totál profesór iha ESG Baqui hamutuk na’in-48, maibé daudau ne’e hela de’it 26, tuir loloos presiza profesór na’in-20 tanba númeru estudante barakliu iha 600 kedas.

Hatán ba preokupasaun ne’e, Diretór Edukasaun Oé-Cusse, Vincencio Cono,  rekoñese problema menus profesór la’ós ESG Baqui de’it maibé iha eskola seluk mós menus profesór.

Tan ne’e, dirijente edukasaun ne’e fó hanoin ba manorin sira,  atu fokuliu ba nonu-anu no désimu segundu-anu atu prepara ba ezame nasionál.

“Ne’ebé falta profesór, diresaun rejionál edukasaun nafatin rekoñese maibé daudaun ne’e, eskola sira la’o hela no depois segundu períodu sei iha kolokasaun profesór atu taka lákuna sira-ne’e, maibé sira-ne’ebé atu destaka ba, la garante sira atu sai profesór permanente, maibé sira tenke submete nafatin ba teste bolsa kandidatu profesór,” nia dehan.

Notísia relevante: Komportamentu no formasaun determina profesór 264 iha Oé-cusse sai permanente

Entretantu, totál eskola sira iha RAEOA hamutuk 114, komposta husi eskola privada 12 no eskola públika 102, mai husi EBF 71, EBC 20, ESG públiku no privada hamutuk lima (5), eskola tékniku vokasionál haat (4), no eskola pré-eskolár (EPE) 14.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!