OÉ-CUSSE 17 fevereiru 2024 (TATOLI)—Prezidente Komisaun Funsaun Públika (KFP), Agostinho Letêncio de Deus, husu ba profesór sira ne’ebé foin simu pose ba ingressu espesiál rejime karreira dosente, tenke hatudu komportamentu di’ak iha sosiedade no kontinua ativa iha formasaun naun formál.
“Profesór ne’ebé ohin hetan ona ingressu, ita-boot sira sei iha hela períodu provatóriu ba tinan-rua, iha tinan-rua nia laran, ne’ebé ezije ita-boot sira-nia komportamentu, sé mak hakarak protesta hela de’it, sá tan halo demostrasaun, signifika ita-boot sira la merese atu ba permanente,” Agostinho Letêncio fó hanoin iha ámbitu serimónia pose ba profesór 264 iha salaun otél Ambeno Oé-cusse, sesta (16/02).
Notísia relevante : Profesór 264 iha Oé-cusse integra-an ba rejime karreira dosente
Nia informa, profesór sira ne’ebé foin simu ingressu espesiál ba rejime karreira dosente, ejize mós formasaun hahú hosi indusaun, formasaun karatér no formasaun área epesializada ba profesór sira.
“Hosi prosesu sira-ne’e hotu mak sei define se ita-boot sira elijível ba permanente ou la’e,” nia akresenta.
Nune’e, Prezidente KFP husu ba profesór 264 atu nafatin hakas-an no badinas nu’udar profesór, atetude nu’udar manorin na’in no dezenvolve nafatin kuiñesimentu profisionál ne’ebé iha ona.
“Nune’e tinan-rua mai oin, ita-boot sira bele selebra kontratu permanente nu’udar funsionáriu publiku,” nia fó tenik.
KFP nia papel maka sei hamutuk ho Ministériu Eduksaun atu oinsá mak iha karreira dosente bele organizada no kria kondisaun sira, nune’e profesór sira bele hala’o didi’ak funsaun atu eduka jerasaun futuru sira ho di’ak.
Ho nune’e maka KFP sei serbisu no kolabora nafatin ho Ministériu Edukasaun inklui Autoridade Rejiaun Administtrativa Oé-cusse Ambeno (RAEOA) atubele defini jetaun rekursu umanu kualidade no profisionál.
Jornalista : Abílio Elo Nini
Editora : Julia Chatarina
