BOBONARO, 18 juñu 2024 (TATOLI)-Tuir dadus husi Diresaun Servisu Munisipál Água, Saneamentu no Ambiente (SMASA) munisípiu Bobonaro identifika aldeia 17 iha munisípiu ne’e mak to’o agora seidauk asesu bee-moos.
Diretór SMASA Munisípiu Bobonaro, Guilhermino da Cruz, informa aldeia hirak-ne’e mai husi postu administrativu Cailaco aldeia tolu ho totál populasaun 1,069, postu Bobonaro aldeia rua no populasaun 739.
Husi parte Loloto’e aldeia rua ho totál populasaun 619, Maliana iha aldeia tolu ho totál populasaun 1,206, Atabae iha aldeia tolu ho totál populasaun 3,266 no postu administrativu Balibo iha aldeia haat ho totál populasaun 2,116 mak seidauk asesu bee-moos.
Notísia relevante: Uma-kain 84 iha Lontas la asesu bee-moos
“Iha munisípiu Bobonaro aldeia 17 ho nia totál populasaun 9,115 mak seidauk asesu bee-moos. Ida-ne’e ami tau iha planu prioridade,” nia aprezenta dadus ne’e durante halo enkontru ho Asosiasaun HAK no parseiru Water Aid iha salaun Kámara Ekleziástika Dioseze Maliana tuan, iha Pemancar, segunda ne’e.
Nune’e mós fasilidade saúde 16 no eskola 39 mak seidauk asesu bee-moos kompostu husi postu administrativu Cailaco iha fasillidade saúde sia, eskola haat, Bobonaro saúde haat no eskola 10.
Husi parte Lolotoe fasillidade saúde ida, eskola rua, Maliana saúde laiha no eskola ualu, Atabae saúde laiha no eskola ualu.
Postu administrativu Lolotoe Fasilidade saúde rua no eskola ualu mak seidauk sei halerik ba bee-moos.
Enkuantu sistema ne’ebé Instala ona ba komunidade asesu bee-moos iha munisípiu Bobonaro kompostu husi postu administrativu Cailaco totál sistema 19 ne’ebé benefísia populasaun 13,509.
Postu Bobonaro sistema 58 benefísia ema 271,166, Maliana sistema 23 benefísia ba ema 8,40, Balibó sistema 26 fornese ba populasaun 13,263, Atabae sistema 15 benefísia ema 7,016 no postu administrativu Lolotoe iha sistema 18 benifisia ba ema 7,932.
Husi númeru ne’e hatudu totál sistema hamutuk 163 kompostu husi gravitasaun 127, bomba 26 ne’ebé durante ne’e fornese bee ba populasaun 77,307.
Servisu Munisipál Água, Saneamentu no Ambiente mós hahú husi tinan 2023 to’o 2024 ne’e halo ona konservasaun bee-matan 24 inklui halo lutu.
Notísia relevante: PAM Bobonaro no ekipa kuda ai-oan 200 hodi konserva bee-matan iha Lebos
Jornalista: Sérgio da Cruz
Editór: Evaristo Soares Martins
