DILI, 18 juñu 2024 (TATOLI)–Pároku igreja Nossa Senhora Imaculada Conceição Balide, Pe. Ângelo Salsinha, hateten Maromak mak espasu no tempu nia na’in iha ema ida-idak nia kamiñada moris iha mundu ida-ne’e.
Notísia Relevante: Kankru Intestinu habadak viajen Isabel Ferreira iha mundu
Ângelo Salsinha esplika, selebra tinan ida inan domin na’in ida lakon iha mundu ne’e, lakon espoza di’ak ida-ne’ebé pasiénsia no haraik-aan, no dedika-aan tomak ba nia família no nasaun tuir arte me’ebé iha.
“Lakon inan di’ak ho ternura, esperansa, kompaisaun, belun ativista patriota di’ak. Bu’at sira-ne’e hotu kontempla Maromak nia laran di’ak no laran luak iha nia kamiñada iha tempu no espasu sira. Nia hatene apenas instrumentu ida Maromak haraik mai mundu hosi momentu frajil. Maromak uza hodi transforma nia arte no beleza iha tempu no espasu ne’ebé limite,” Pároku Balide, Ângelo Salsinha, hateten iha misa agradesimentu tinan ida (18 juñu 2023-18 juñu 2024) ba matebian DIsabel da Costa Ferreira, iha igreja Balide, tersa ne’e.
Nia sujere, ema hotu sai tenke afirma nia aan hodi uza tempu no espasu sira hodi halo di’ak no memoria sai instrumentu ida se mak Maromak no virtude no valores ne’ebé nia buka nia dalan moris.
Padre mos konvida ema hotu atu moris iha dor iha situasaun difísil, maibé hatudu nia oin midar, moris iha konptemplasaun, orasaun, domin no kompaisaun ida-ne’ebé profundu kona-ba Maromak, ema sira-ne’e moris iha bem aventuransa.
Hanesan haktuir iha primeira leitura, Job fó nia konfiansa ba Maromak nu’udar ema frajil iha tempu no espasu limitadu hodi hakerek buat ne’ebé furak.
Tuir nia, prinsipiu no dom ba moris mak Maromak de’it, tanba ne’e mak Job hateten iha tempu no espasu ne’ebé iha ne’e hakerek ninia istória iha fatuk atu labele lakon.
“Ha’u hatene katak ha’u-nia maksoi moris hela iha loron ikus ha’u sei hahi. Ha’u-nia isin sei tomak fali, ha’u sei hadeer hodi haree Maromak, ha’u matan sei fihir nia. Konfiansa ba prinsipiu tempu no espasu nia na’in sein rezerva. Hahú husi konfiansa, ha’u hahú hakerek ha’u-nia istória. Iha tempu no espasu sira, ha’u buka atu koresponde ba prinsipiu moris nian iha inserteza,” nia hateten.
Nia reforsa, Jesus mós konvida ema hotu katak, “Tempu no espasu Maromak nian katak moris ne’e Maromak nian, tanba ne’e ohin Jesus dehan imi keta laran susar, imi fiar ba ha’u no Maromak, iha ha’u-nia aman nia uma iha horik fatin barak, lae karik, ha’u ladehan ba imi ha’u lahadi’a fatin ba imi”.
Problema ba ema moris no la’o-rai iha mundu ne’e preokupa tempu no espasu, maibé ema la preokupa sé mak na’in ba tempu no espasu ne’ebé ikus liu ne’e tenke ba entrega aan.
Nia hateten, Kristu aprezenta nia aan katak nia dalan no lia-loos no moris tanba dalan úniku ne’ebé sei salva ema iha loron ikus mak Jesus Kristu, dalan úniku mak Jesus Kristu, dalan salvasaun, rekonsialiasaun no dalan resureisaun, dalan pás no hakmantek dalan sakrifisiu no krús dalan hotu-hotu iha sentidu Jesus Kristu.
Espozu no oan hosi matebian Isabel da Costa Ferreira, agradese ba familia, kolega no ema hotu ne’ebé marka prezena iha misa agradesimentu ba tinan ida-nian, liuhosi panfletu ne’ebé fahe kovidadu sira hotu.
“Ami agradese ba ida-idak nia prezente iha ne’e no sira hotu ne’ebé apoia ami iha tempu defísil, espesiál ba ami-nia familia Vasconselos no Ferreira. Ba sira-nia amizade, orasaun no kariñu ne’ebé sai konfortu boot ida ba ami,” nia dehan.
Panfletu ne’e mós deskreve lahahula hasa’e agradese ba Maromak ba priviléjiu ne’ebé fó inan ida no kompañeira maravilloza, feto ida ho forsa no fiar ne’ebé hanorin ema valór domin ba família no uniaun no fiar.
Atu memoriza moris ne’e, iha pamfletu ne’e; “Ba ami aman, obrigadu barak sai ami-nia maior forsa. Seu amor no dedikasaun sai pilar ba ami. To’o loron ida Mommy. Ami sente ita-nia falta, maibé ami hatene ita hasoru malu konfortu katak ita-nia espíritu amorozu hamutuk nafatin ho ami”.
Reprezentante Vatikanu iha Timor-Leste, Marco Sprizzi, lembra, dona Isabel da Costa Ferreira, iha nia dedikasaun no partisipasaun iha santa misa no orasaun no edukadora nu’udar testemuña no lembransa inan nian ba nia oan sira.
“Nia iha prioridade ba edukasaun ba oan sira-nian hanesan inan sira seluk,” Reprezentante Vatikanu iha Timor-Leste, Marco Sprizzi, hateten iha nia intervensaun hafoin misa agradesimentu ne’e.
Iha selebrasaun misa ne’e marka prezenza husi eis-titulár sira, membru Governu, membru Parlamentu Nasionál no diplomata sira no kolega sira hotu.
Notísia Relevante: Adeus lutadora Direitu Umanu, Adeus inan-doben Isabel Ferreira!
Jornalista : Jesuína Xavier
Editór : Cancio Ximenes
