iklan

NASIONÁL, JUSTISA, DILI, HEADLINE, POLÍTIKA

PR husu Komisáriu foun CAC servisu ho seriedade hodi kombate korrupsaun

PR husu Komisáriu foun CAC servisu ho seriedade hodi kombate korrupsaun

Prezidente Repúblika, José Ramos-Horta. Imajen/Tatoli Egas Cristóvão

DILI, 18 juñu 2024 (TATOLI) – Prezidente Repúblika José Ramos Horta husu ba Komisáriu Komisaun Anti Korupsaun (KAK) foun atu serbisu ho seriedade no imparsiál hodi kombate Korupsaun, Koluzaun no Nepotizmu (KKN) iha Timor-Leste.

Konsellu Ministru delibera no propoin ba Parlamentu Nasionál hodi nomeia Rui Pereira dos Santos, hanesan Komisáriu Komisaun Anti Korrupsaun (CAC).

Notísia relevante:Governu propoin Rui Pereira dos Santos ba asume kargu Komisáriu CAC

“Nia ema di’ak mak Governu hili ona, buat ida mak ha’u hakarak rekomenda ba CAC mak ne’e, favór haree didi’ak ba buat ne’ebé mak importante duni atu ajuda kontribui ba hametin kombate korRupsaun ho mekanizmu no idea rekomendasaun la’ós halo fali presegisaun hanesan Polísia,” Xefe Estadu hateten ba jornalista sira iha edifisiu Ministeriu Negósiu Estranjeiru (MNEK) Dili, tersa ne’e.

Nune’e, nia mós husu ba KAK atu estuda didi’ak ba kazu hotu antes foti desizaun tanba aktu hotu ne’ebé iha la’ós kategoria hotu ba korrupsaun.

“Estuda didi’ak kazu hotu, la’ós buat hotu-hotu ne’e korrupsaun. Ezemplu Ministru ida sosa ekipamentu husi ne’ebé de’it maibé to’o ikus sosa sala, ikus halo investigasaun dehan kedan ema ne’e korrupsaun, maibé ita tenke haree lai tanba se la’e parte balun mak bosok sira atu nune’e ita kondena mós parte balun ne’ebé bosok Ministru ne’e ho nia ekipa, atu nune’e buat hotu bele la’o ho imparsiál,” Xefe Estadu fó hanoin.

Tuir Xefe Estadu, laiha esperiénsia no neglijénsia hodi foti desizaun la’ós korupsaun.

“Komisáriu KAK foun tenke haree buat sira ne’e, ha’u apoia nia 100%, segunda alterasaun ba lei KAK ne’ebé Governu muda ne’e di’ak loos, ha’u konkorda atu nune’e ita labele dada malu bebeik hodi husik fatin ne’e mamuk bebeik,” nia konklui.

Notísia relevante:PN sei haruka alterasaun lei CAC ba PR

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!