DILI, 19 juñu 2024 (TATOLI)–Vise Koordenadór ba Vizita Papa hosi Igreja no atuál Pároku Igreja Santo António Motael, Guilhermino da Silva, hateten komisaun organizadora deside kada parokia hili ema 70 sai membru koru hodi bele partisipa iha misa solene ne’ebé Papa Francisco preside iha Tasi-Tolu.
Notísia Relevante: Madre Salesiana responsabiliza halo dekorasaun altar ba misa solene iha Tasi-Tolu
Nia hateten, komisaun organizadora prepara ona testu múzika no fahe ona fotokopia testu muzika sira-ne’e ba kada parokia, atu sira halo ensaiu iha ida-idak nia parokia no hafoin ne’e mak ekipa sira-ne’e halo ensaiu hamutuk.
“Koru iha ema 1.110 ne’e inklui membru koru husi Dioseze Baucau no Maliana ne’e iha ema 200. Membru koru restante ne’e husi dioseze Dili, tanba kestaun distánsia no ensaiu hamutuk. Kada parokia tenke buka sira-nia ema na’in-70 atu partisipa iha eventu ida-ne’e ba koru misa nian iha Tasi-Tolu”, Vise Kordenadór ba Vizita Papa hosi Igreja no atual Pároku Igreja Motael, Guilhermino da Silva, hateten ba Agência Tatoli, iha Motael.
Nia hateten, membru koru dioseze Dili nian sei ensaiu hamutuk iha fulan ida dala ida hodi ensaiu hamutuk no iha fulan-jullu oin ne’e, membru koru hamutuk 1.100 husi dioseze tolu ne’e sei halo ensaiu hamutuk iha Jinaziu ka Gedung Matahari Terbit (GMT).
Múzika sira-ne’e la’os foun maibé múzikia sira-ne’e baibain ema kanta ne’e, nune’e agora ne’e presiza mak sira treinu. Múzika sira-ne’e fahe ona ba vos haat maka solu, sopran, altu no tenor, entaun presiza treinu atu bele iha uniformidade atu bele la’o no kanta hamutuk iha misa Tasi-Tolu ne’e.
Nia hateten, seksaun liturjia aprezenta ema na’in-haat (4) ne’ebé tama iha maestru ba koru misa solene nian mak hanesan maesrtur rua hosi dioseze Dili, ida hosi Baucau no ida hosi Maliana.
“Maestru sira husi dioseze Dili mak Pe. Joel Casmiro Pinto, Pe. Elio Nunes. Husi dioseze Baucau mak Pe. Aderito da Costa, SDB, no husi dioseze Maliana mak Frater Jonas. Depois, sira sei fahe múzika sira-ne’e ba malu durante iha misa laran,” nia dehan.
Notísia Relevante: Igreja prepara túnika 2.000 no siboriu 4.000 ba ministru estraordináriu
Jornalista : Jesuína Xavier
Editór : Cancio Ximenes
