DILI, 20 Juñu 2024 (TATOLI) – Diresaun Nasionál Pekuária, Ministériu Agrikultura, Pekuária, Peska no Floresta (MAPPF), simu proposta 40 husi grupu haki’ak-na’in sira, ne’ebé daudaun ne’e tékniku sira halo hela selesaun hodi bele distribui fini animál sira.
Diretór Nasionál Pekuária, Augusto Barros, informa katak molok disponibiliza apoiu, diresaun sei halo uluk observasaun bá fatin ne’ebé benefisiáriu sira prepara ba haki’ak balada sira ne’e, liuliu iha Dili tanba iha ona regulamentu ne’ebé fó sai ona husi Autoridade Munisípiu Dili atu labele haki’ak animál iha fatin públiku ka besik populasaun sira-nia hela fatin.
“Ita-nia ekipa téknika sira daudaun halo hela prosesu selesaun ba proposta benefisiáriu sira-nian ne’ebé submete ona mai diresaun. Kuandu iha proposta ne’e maka identifika iha benefisiáriu balun husi Dili, ekipa tenke bá halo observasaun”, dirijente dehan ba Tatoli iha Comoro, ohin.
Haki’ak animál iha kapitál presiza obedese ba regra
Augusto Barros esplika katak ba grupu sira ne’ebé haki’ak animál iha kapitál ne’e presiza muda sira-nia fatin, nune’e bele obedese ba regra sira ne’ebé fó sai ona.
“Diresaun Pekuária la bandu no la taka dalan ba benefisiáriu sira husi Dili atu haki’ak animál, maibé tanba haree fali ba regra sira ne’ebé autoridade Dili hasai ona hodi bandu labele hakiak animal iha kapitál, entaun diresaun mós lakohi atu foti risku hodi kontra regra sira ne’e”, esplika.
Tanba ne’e, maka proposta ne’ebé tama ona sei avalia no bainhira identifika iha grupu ka benefisiáriu ruma husi Dili, diresaun sei observa uluk nia fatin atu haki’ak animál, nune’e labele prejudika fali ema nia saúde.
“Mezmu sira iha preparasaun ba kondisaun luhan ne’ebé di’ak hodi haki’ak fahi, karau no bibi, sira tenke hetan autorizasaun husi Munisípiu Dili. Sira ne’e presiza prienxe rekizitu sira ne’ebé Autoridade Munisípiu Dili hasai ona katak fahi ne’ebé haki’ak iha Dili tenke dook husi komunidade”, nia hatutan.
Tanba ne’e, Diresaun Nasional Pekuária sei tau prioridade ba grupu sira ne’ebé mai husi munisípiu seluk, liuliu iha área rurál sira tanba iha kondisaun rai ne’ebé sei luan no dook husi populasaun.
Tuir planu, Diresaun Pekuária sei sosa tan karau vaka hamutuk ulun 48 no nia prosesu tama ona konkursu públiku. Orsamentu ba akizisaun balada ne’e diresaun prevee ona rihun $24.
Lembra katak, iha tinan kotuk, MAPPF disponibiliza ona fahi, karau, no bibi par 30 ba grupu 15, kompostu husi Dili iha grupu rua, Maatuto tolu, Liquiçá tolu, Manufahi tolu no Covalima haat.
Animál sira ne’e ministériu sosa ho osan hamutuk rihun $48. Balada sira ne’e kompostu husi fahi rasa par 15, karau vaka 10 no bibi lima.
Notísia relevante: MAPPF distribui fini animál ba grupu 200 iha territóriu nasionál
Jornalista: Tome Amado
Editora: Maria Auxiliadora
