iklan

EDUKASAUN, HEADLINE

Konsensaun eskolár tarde difikulta ezame

Konsensaun eskolár tarde difikulta ezame

Diretór Eskola Ensinu Sekundáriu Jerál FINANTIL iha Comoro, Aniceto Barlelo. Imajen Tatoli/Osória Marques

DILI, 20 juñu 2024 (TATOLI)–Diretór Eskola Ensinu Sekundáriu Jerál (ESJ) Fitun Naroman Timor-Lorosa’e (Finantil) iha Comoro, Aniceto Barlelo, hateten, osan konsensaun eskolár ne’ebé to’o agora seidauk tama ba konta bankária kada eskola sei difikulta ba ezame trimestre daruak.

“Ami ba enkontru ona, katak tempu badak osan konsensaun eskolár ne’e tama ona ba bankária kada eskola nian, maibé depois enkontru to’o agora osan seidauk tama, ne’ebé kuandu orsamentu ne’e tarde, signifika difikulta tan ona ezame ba segundu períodu. Ministériu Edukasaun (ME) bandu ona labele husu kontribuisaun ba estudante inklui nia inan aman sira,” Diretór Eskola informa iha ninia knaar fatin, Ai-mutin, kinta ne’e.

Biban ne’e, nia husu ba ME atu aselera lalais prosesu transferénsia nune’e labele repete tan problema anteriór sira-ne’ebé eskola sira sempre enfrenta.

“Ha’u ladún konkorda bainhira osan tama tarde depois haruka eskola sira buka meiu seluk, ne’e osan Estadu ne’ebé tenke aloka, labele repete tan hahalok ida haruka ami deve ne’e, tanba ne’e ladún di’ak, ita deve ona ne’e seidauk selu tan, agora trimestre daruak ida-ne’e ita atu foti tan sé nia osan atu uza ba atividade ezame,” nia lamenta.

Notísia relevante : ME hahú transfere konsensaun eskolár ba nível eskolaridade iha semana oin

Tanba ne’e, Dirijente eskola husu ba ME atu halo transferénsia nune’e bele uza ba atividade eskola, tanba bainhira laiha osan maka difikulta realiza atividade eskola nia inklui relatóriu tuir matadalan.

Aleinde ne’e, Eskola Finantil rasik menus profesór hodi hanorin matéria tolu hanesan lian portugés, tetum no multimedia.

“Maski ami menus profesór ba matéria tolu ne’e tanba profesór sira kaer matéria ne’e moras grave ona, maibé ami nafatin buka meiu hodi prienxe kedas, nune’e labele difikulta prosesu aprendizajen tanba ezame besik ona. Ho ida-ne’e ami mós halo ona pedidu ba ME atu koloka profesór na’in-tolu ba matéria ne’ebé profesór laiha ne’e no ami hein katak bazeia ba pedidu ne’e ba terseiru períodu profesór hirak-ne’e bele kompletu ona,” nia esplika.

Eskola ESJ Finantil iha estudante hamutuk 1.700, profesór 67, no saladeaula 18.

Iha fatin ketak, Diretór Eskola ESJ Nicolau Lobato, Marcos Pacheco, hateten, parte eskola presiza konsensaun eskolár hodi bele realiza atividade ba ezame períodu daruak nian.

“Osan konsensaun eskolár kuandu tarde mak sei prejudika ba prosesu imprensaun. Eskola ne’e privada ne’ebé di’ak no ba ami la fó impaktu, impaktu ba eskola públiku sira,” nia dehan.

Tanba ne’e, nia rekomenda ba ME atu fasilita no aselera lalais programa ne’e tanba ezame períodu daruak hela semana rua.

“Presiza fasilita lalais tanba ezame períodu dahuluk ami deve ona no daruak atu ezame ladun di’ak. Nune’e, husu ba Ministériu Edukasaun atu aselera lalais konsensaun eskolár hodi realiza ezame períodu daruak la’o ho di’ak,” nia akresenta.

Tuir kalendáriu husi ME, ezame períodu daruak iha loron 15 jullu, nune’e Eskola ESJ Nicolau Lobato halo ona preparasaun desde tersa liubá mak forma ona komisaun ida no agora orienta ona profesór sira atu elabora pontu ezame.

“Durante ami halo evaluasaun ba estudante ladun di’ak, tanba ne’e mak ami orienta ona profesór atu elabora ezame períodu daruak iha mós pilihan ganda no essay test. Nune’e, estudante bele deskobre buat ruma, se kuandu ita fó mak pilihan ganda no sira mai riska ba-mai de’it maka sei la hatene buat ida, tanba ne’e Konsellu Profesór sira deside hamosu tan essay test,” nia dehan.

Totál profesór iha Eskola ESJ Nicolau Lobato Tasitolu hamutuk 39, kompostu husu permanente 18 no voluntáriu 21, ne’ebé fundasaun mak selu. Totál estudante  hamutuk 1.353 no iha saladeaula 16.

Nune’e mós, Diretór Eskola Ensinu Báziku Sentrál (EBC, sigla portugés) 10 Dezembru iha Comoro, Nicolau Amaral, hateten, ezame períodu daruak ne’e sei hasoru difikuldade tanba atu atinje meta presiza apoiu orsamentu mak foin realiza ezame maibé to’o agora seidauk iha osan.

“Ita iha obrigasaun atu prepara pontou ezame ba períodu daruak nian, maibé atu dehan kuandu tarde ne’e filafali ba ita profesór ho métodu konsiénsia oinsá atu realiza ezame ida-ne’e. Maibé ezame ne’e mak diferente ho períodu dahuluk ona,” nia hato’o.

Períodu dahuluk, parte eskola iha konkordánsia ho fatin impresaun sira hodi halo imprensaun ba pontu ezame.

“Osan tama tarde klaru profesór ida-idak prepara matéria hodi fó ezame ba ita-nia estudante sira, ida-ne’e mak meiu ida ita uza hodi realiza ezame. Ami lakohi aumenta tusan no sai dubru. Ha’u rekomenda ba Ministériu Edukasaun atu halo transparánsia ba orsamentu konsensaun eskolár no aselera lalais hodi ita bele realiza ita-nia ezame ne’e ho di’ak,” nia dehan.

Totál estudante iha Eskola ne’e hamutuk 852 no profesór 48 permanente hotu.

Tarde tanba prosesu tranzisaun dirijente

Sekretáriu Estadu Ensinu Sekundáriu Jerál no Ensinu Tékniku Vokasionál (SEESJ-ESTV ),  Domingos Lemos Lopes, informa, konsensaun eskolár ne’e la’o tarde oituan tanba direjente sira hand over serbisu maibé buat hotu la’o ona, ne’ebé molok ba períodu daruak, konsensaun eskolár ne’e tama ona ba konta bankária kada eskola.

“Atividade ida atu la’o di’ak presiza orsamentu, tanba ne’e mak sesta semana kotuk hand over ona ba estrutura foun diretiva eskola. Daudaun ne’e diresaun husi Sekretaria Estadu trata ona asuntu ne’e, liu-liu osan konsensaun eskolár no kinta 13 juñu ne’e ami bolu hotu diretiva sira mai atu fó orientasaun serbisu,” nia informa.

Aleinde ne’e, diretiva sira lori kedas ho eleitorál mai nune’e semana oin osan konsensaun eskolár ne’e tama ona iha konta bankária.

“Ita fó prazu semana ida atu rezolve situasaun hirak ne’e ba nível eskolaridade ensinu sekundáriu no tékniku vokasionál. Molok ba períodu daruak, konsensaun eskolár ne’e tama ona ba konta bankária ida-idak,” Sekretáriu Estadu akresenta.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!