DILI, 11 juñu 2024 (TATOLI)–Ministériu Edukasaun (ME) hahú transfere osan konsensaun eskolár ba nível eskolaridade iha territóriu nasionál iha semana oin.
“Atividade ida atu la’o di’ak presiza orsamentu, ezame primeiru períodu nian, ha’u hanoin Sekretáriu Estadu Ensinu Sekundáriu Jerál no Ensinu Tékniku Vokasionál, ami tenta nafatin eskola sira tanba iha fim dezembru osan konsensaun eskolár tama iha eskola ida-idak ninia konta bankária. Tanba ne’e mak sesta semana kotuk handover ona ba estrutura foun diretiva eskola nian, no daudaun ne’e mós diresaun husi Sekretáriu Estadu trata ona asuntu osan konsensaun eskolár,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, informa ba Agência Tatoli, iha ninia knaar fatin, Vila Verde, tersa ne’e.
ME iha loron 13 juñu sei bolu diretiva sira mai atu fó orientasaun serbisu. Iha enkontru ne’e diretiva sira mai lori ho sira-nai eleitorál hodi bele prosesa ona osan, nune’e bele transfere ona ba eskola hodi bele realiza ba ida-idak ninia atividade.
“Sira lori kedas ho eleitorál mai nune’e semana oin osan konsensaun eskolár ne’e tama ona iha konta bankária eskola ida-idak nia. Ita fó prazu semana ida atu rezolve situasaun hirak ne’e. ida-ne’e ba nível eskolaridade. Molok ba segundu períodu, konsensaun eskolár ne’e tama ona ba konta bankária ida-idak, osan tama ona no sira loke konta bankária distribui ona,” nia akresenta.
Notísia relevante : ME seidauk fahe konsensaun eskolár ba Ensinu Báziku iha Ainaro tanba presiza formasaun
Diretora Eskola Ensinu Báziku Sentrál (EBC, sigla portugés), Filomena Freitas, preokupa ho osan konsensaun eskolár tanba tama tarde, enkuantu besik ona ezame períodu daruak.
“Konsensaun eskolár to’o agora seidauk tama, fulan ne’e aprendizajen tolu no semana rua fulan jullu entaun tama ba ezame períodu daruak ona. Entaun aula normál ne’e sei iha fulan-ida semana ida, no ba semana tuir mai forma ekipa nune’e bele prepara matéria ezame nian,” nia informa.
Kuandu tama tarde mak eskola referidu sei hasoru difikuldade iha prosesu imprensaun ba matéria sira.
“Ami sei deve hela primeiru períodu nian, sera que iha segundu períodu ami halo tan empréstimu ka oinsá. Nune’e hela semana balun de’it, entaun ami rekomenda ba ministériu atu haree took asuntu ne’e. Karik halo empréstimu, entaun dehan hela mai nune’e eskola halo tanba atu prepara ba atividade ezame nian,” nia tenik.
Jornalista : Osória Marques
Editora : Julia Chatarina
