DILI, 04 junu 2024 (TATOLI)—Ministériu Edukasaun (ME) aloka ona osan konsensaun eskolár ba Ensinu Báziku iha munisípiu Ainaro maibé seidauk halo distribuisaun ba eskola sira.
“Ministériu Edukasaun haruka ona osan konsensaun eskolár ba konta ensinu báziku sira iha munisípiu Ainaro maibé seidauk bele atribui ba kada eskola tanba sei hein parte nasionál fó formasaun kona-ba manuál konsensaun eskolár nian hodi hatene halo jestaun ba osan referidu,” Diretór Servisu Edukasaun munisípiu Ainaro, Patrício da Cruz, informa ba Agência Tatoli, iha edifísiu ME, Vila Verde, tersa ne’e.
Kona-ba Eskola Ensinu Sekundáriu Jerál no Tékniku Vokasionál osan seidauk tama konta tanba parte nasionál hahú formasaun ba Ensinu Báziku iha munisípiu seluk.
“Presiza aselera prosesu ne’e tanba ezame períodu daruak besik ona,” nia akresenta.
Notísia relevante : ME kapasita diretór eskola sira kona-ba uja osan konsensaun eskolár
Atribuisaun osan ne’e ba fulan-neen nian, husi fulan-janeiru to’o juñu, tanba iha manuál ne’e transfere dala-rua iha tinan-ida, nune’e janeiru to’o juñu no jullu to’o dezembru.
Ensinu Báziku iha Ainaro hamutuk 17, ne’ebé númeru ne’e inklui ho Filiál sira, ho totál estudante 17.410. Osan alokadu hamutuk $208.920.
Nune’e mós, Diretór Edukasaun munisípiu Dili, Sabino da Costa, informa katak sei hein prosesu dadus hodi ajusta ba relatóriu.
“Kona-ba konsensaun eskolár munisípiu Dili nian, prosesu ne’e la’o hela, tanba iha buat balun ne’ebé tenke ajusta dadus. Tanba ne’e ninia prosesu ba osan konsensaun eskolár la’o hela. Ita hein bainhira aloka Ita sei atribui ba eskola sira,” nia garante.
Iha fatin seluk, Diretora Eskola Bázika Sentrál (EBC, sigla portugés) Farol, Filomena Freitas, preokupa tebes ho prosesu konsensaun eskolár.
“Ita deve hela imprensaun Mitra nian hodi impreme no fulan-rua ona maibé Ministériu Edukasaun seidauk aloka osan ne’e. Ami la’ós ezije maibé nesesidade eskola mak presiza,” nia dehan.
Tanba ne’e, responsável eskola husu ba ME atu aselera prosesu nune’e bele aloka osan hodi halo preparasaun ba ezame períodu daruak nian.
Jornalista : Osória Marques
Editora : Julia Chatarina
