Papa Francisco sei hala’o sorumutu ho reprezentante juventude 2.000 iha CCD
DILI, 21 juñu 2024 (TATOLI)–Vise Koordenadór ba Vizita Papa husi Igreja no atuál Pároku Igreja Santo António Motael, Guilhermino da Silva, hateten Papa Francisco hala’o vizita pastorál iha Timor-Leste ne’e sei hala’o sorumutu ho reprezentante juventude Timor-Leste 2.000 iha Sentru Kovensaun Dili (CCD).
Notísia Relevante: Madre Salesiana responsabiliza halo dekorasaun altar ba misa solene iha Tasi-Tolu
“Tuir planu ne’ebé iha, Papa sei hala’o sorumutu ho foinsaé sira 2.000. Joven sira-ne’e mai hosi grupu kreda nian, estudante universitáriu sira no grupu hotu iha sosiedade Timor-Leste,” Pároku Igreja Motael, Guilhermino da Silva, hateten ba Agência Tatoli, iha Motael.
Iha sorumutu ne’e, nia dehan, laiha tema espesifiku ba joven sira maibé Papa Francisco hakarak kumprimenta no sauda foinsa’e sira no hakarak ko’alia iha tema jerál, maibé nia kontestu ne’e ba liu joven sira.
“Papa sei ko’alia kona-ba ‘Imi-nia fiar sira sai imi-nia kultura iha ema joven sira aan mak oinsa’. Papa sei ko’alia ida-ne’e,” nia dehan.
Aleinde ne’e, Papa Francisco sei hasoru malu mös ho padre-madre, katekista no leigu sira iha vizita pastorál ne’e.
“Padre madre sira hamutuk la to’o rihun ida no katekista sira kuaze 15.000. Tuir planu tenke ba hotu, maibé sei hili reprezentante de’it tanba kestaun fatin,” nia hateten.
Tuir nia, númeru katekista sira iha territóriu ne’e barak liu tanba iha dioseze Dili de’it iha katekista hamutuk 9.000, entaun sei hili no reprezenta sira hodi balun de’it mak bele ba.
Iha sorumutu ne’e, Francisco mós sei ko’alia la sees husi tem aba vizita pastorál ne’e mak “Atu imi nia fiar sai imi-nia kultura”, tanba Amu Papa kulia ho madre no padre sira-ne’e iha kontestu pastorál iha dioseze no igreja lokál.
Notísia Relevante: Preparasaun simu Papa: Kada parokia hili ema 70 sai membru koru
Jornalista : Jesuína Xavier
Editór : Cancio Ximenes
