iklan

HEADLINE, MUNISÍPIU, OÉ-CUSSE (RAEOA)

Implementasaun merenda eskolár iha Oé-cusse hahú semana oin

Implementasaun merenda eskolár iha Oé-cusse hahú semana oin

Servisu Edukasaun RAEOA realiza enkontru alokasaun orsamentu ba eskola sira ho montante $305.306,40 atu hahú implementa ona programa merenda eskolár faze dahuluk iha semana oin, iha salaun edukasaun Oé-cusse, sábadu (22/06/2024). Imajen Tatoli/Abílio Elo Nini

OÉ-CUSSE, 22 juñu 2024 (TATOLI)Servisu Edukasaun Rejiaun Administrativa Espesiál Oé-cusse Ambeno (RAEOA), sábadu ne’e, realiza enkontru alokasaun orsamentu ba eskola sira ho montante $305.306,40 atu hahú implementa ona programa merenda eskolár faze dahuluk.

“Ohin ami enkontru orientasaun ba fornesedór no dirijente eskola sira no fahe ona osan ba sira tanba segunda semana oin implementa ona, ba loron efetivu 40, hahú 24 juñu to’o 24 agostu 2024,” Diretór Edukasaun Oé-cusse, Vincêncio Cono, informa ba jornalista sira iha salaun edukasaun Oé-cusse,” nia fó hanoin.

Notisia relevante : RAEOA aloka rihun $305-resin hodi finansia merenda eskolár ba loron 40

Orsamentu ba programa merenda eskolár ne’e hamutuk $305.306,40 ba estudante 18.173, kompostu husi Ensinu Pré-Eskolár  estudante 748 ho osan $12.566,40 no Ensinu Báziku estudante 17.425 ho osan $292.740.

Aleinde ne’e, programa merenda eskolár ne’e ba de’it eskola públiku sira, maibé eskola privada sira rezerva ba tinan 2025 no tama ona iha Planu Asaun Anuál (PAA).

“Kada estudante han sentavu 0,42 loron-ida, sentavu 00,7 ba administrasaun, sentavu 0,35 atu gasta loloos ba merenda eskolár multiplika ba loron efetivu 40,” nia akresenta.

Dirijente Edukasaun ne’e esplika, mekanizmu sira sura efetivu inklui loron sábadu atu estudante sira hotu tenke asesu ba estrakurikulér no aula reforsu ba profesór sira-ne’ebé dalaruma auzénsia iha loron efetivu hodi bele kompleta fali iha loron sábadu.

“Ami sujere, jere ho rigór, tuir matadalan ne’ebé iha, no tuir menu loron-loron nian, ba iha eskola ida-idak, depois ami informa mós atubele aselera lalais relatóriu no ami tau kedas deadline atu hatama relatóriu iha loron 31 agostu 2024 ne’e, nune’e bele submete ona ba relatóriu atu hatama ba sistema no prosesa ba faze tuir mai,” nia dehan.

Notisia relevante : Programa merenda eskolár iha Oé-Cusse sei iha faze elaborasaun

Iha biban ne’e, nia apela fornesedór sira tenke fornese di’ak ho partisipativa iha eskola, labele fornesedór lida de’it kada tinan mak fornese iha eskola, maibé tenke rotasaun ba bairru hotu ne’ebé pertense ba eskola ne’e, nune’e bele kria unidade iha implementasaun ezekusaun orsamentu programa merenda eskolár ne’e.

Diretór EBC Pássabe, Domingos Mauno, agradese ba Governu Timor-Leste tanba bele aumenta orsamentu merenda eskolár, ne’ebé antes ne’e sentavu 0,25 maibé agora aumenta ba sentavu 0,42 kada estudante loron-ida.

“Osan ne’e Estadu nian, ami tenke uza ba nesesidade eskola, katak tenke fornese produtu lokál ba estudante, ne’ebé ami promete sei ezekuta bazeia ba livru manuál ne’ebé iha sai hanesan matadalan mai ami atu la’o tuir,” nia garante.

Koordenadóra EBC Noafafo, Petronela da Costa, hateten, programa nasionál ne’e durante ne’e hala’o ona, nia xave primeiru maka tenke serbisu hamutuk ho fornesedór, kria grupu husi eskola, konsellu dos pais no fornesedór sira, nune’e serbisu hamutuk atu ezekuta osan ne’ebé simu, hodi fornese hahán ba estudante sira.

“Iha tinan kotuk, programa ne’e implementa husi CARE Hatutan mak fornese nesesidade bázika de’it hanesan koto, mina, foos, maibé agora Governu nian fali oferese osan, ne’ebé osan ne’e mak fornesedór utiliza hodi sosa foos, modo, na’an no seluk tan atu fornese ba estudante sira,” nia katak.

Jornalista     : Abílio Elo Nini

Editora         : Julia Chatarina

iklan
iklan

Leave a Reply

iklan
error: Content is protected !!