DILI, 22 juñu 2024 (TATOLI)—Sala Leitura Xanana Gusmão, sábadu kalan ne’e, selebra tinan 24 ezisténsia no iha tempu hanesan selebra aniversáriu atuál Primeiru-Ministru, Kay Rala Xanana Gusmão ba dala-78 iha El-Legendário, Bidau Lecidere.
“Kalan ida-ne’e Sala Leitura Xanana Gusmão marka tinan 24 hanesan símbolu no kompromisu atu promove literasia no edukasaun, simplesmente Sala Leitura sai ona mata dalan no espera ba ema barak inklui sai fatin atu ema hotu buka hatene no apreende,” Diretora Sala Leitura Xanana Gusmão, Maria Amaral Guterres, hateten.
Nia dehan, fatin ne’e harii ho objetivu ida atu kria espasu úniku no inkluzivu ne’ebé mak bele hamosu paisaun ba lee no apreende ba komunidade Timor-Leste, liu-liu ba jerasaun foun sira.
“Sala Leitura mós harii atu fornese ambiente ne’ebé amigável ba ema hotu no fasil hodi asesu atu promove literasia, hanoin krítiku, kreatividade inklui konserva kultura no identidade Timor-Leste nian liuhusi fasilidade no programa edukativu. Sala Leitura Xanana Gusmão mai ho objetivu atu hakbiit ema hotu nune’e bele kontribui ba dezenvolvimentu,” nia akresenta.
Notísia relevante : Japaun apoia reabilitasaun Sala Leitura Xanana Gusmão ho $68.324
Kada loron vizitante ba fatin ne’e husi 80 to’o 100 no dalaruma bele liu númeru ne’e. Tuir dadus, husi tinan 2023 nian, totál vizitante ne’ebé mai vizita Sala Leitura Xanana hamutuk 26.595, ne’ebé husi númeru ne’e, feto mak barak liu ho persentajen 60%, kompara ho mane 40%.
“Ami-nia fasilidade sira mak hanesan biblioteka ba lee livru no empresta livru. Ami mós fornese internet, iha komputadór 10 maibé husi númeru ne’e hela tolu mak funsiona,” nia informa.
Nune’e mós, iha fatin ba labarik ne’ebé hanaran BBTK, programa Biblioteka Móvel ba komunidade nomós eskola inklui programa vizita eskola no komunidade inklui halo mós kompetisaun ba hakerek istória sira.
“Ami hakarak iha selebrasaun aniversáriu ida-ne’e bele konvida ema hotu atu suporta ami-nia programa nomós fasilidade sira. Ami fiar katak kondisaun sira-ne’ebé ita-boot sira sei kontribui la’ós tanba Maun Boot ka la’ós tanba Sala Leitura, maibé tanba ita hotu preokupa no hakarak kontribui ba ita-nia labarik no joven sira-nia futuru liuhusi edukasaun ne’ebé Sala Leitura fornese hodi hamoris kultura lee no apreende, tanba ne’e mai ita hotu hamutuk halo mudansa,”nia tenik.
Halo angariasaun
Iha biban ne’e, Sala Leitura Xanana Gusmão hakarak halo angariasaun hodi suporta programa no atividade inklui fasilidade sira tanba hanesan organizasaun sein fins lukrutivu, hasoru mós difikuldade barak.
“Angariasaun ne’e hakarak atu alarga ami-nia espasu, tanba kalan loron ema ne’ebé mai asesu ami-nia espasu husi 80 to’o 100, entaun labele akumula ami-nia kliente sira ne’e. Dalaruma kliente sira mai fatin laiha,” nia fó sai.
Biban ne’e, Maria Amaral Guterres kongratula Fundadór Sala Leitura Xanana sira no Patrosinadór ne’ebé durante ne’e apoia inklui funsionáriu no voluntáriu sira atu kontinua hatudu apoia hodi kontribui ba misaun no vizaun Sala Leitura nian hodi kontinua sai fatin apreende ba joven no labarik sira.
“Mai ita kontinua haburas Sala Leitura no asegura katak fatin ida-ne’e nafatin sai fatin apreende, kreatividade no haburas personalidade,” nia enkoraja.
Iha fatin hanesan, Fundadora Sala Leitura Xanana Gusmão, Kirsty Sword Gusmão, hateten, kriasaun organizasaun ne’e hakarak fó hanoin ba joven tenke kuda kultura lee.
“Kultura ne’e importante tanba husi lee ita bele apreende buat barak, tanba ne’e mak Sala Leitura Xanana Gusmão eziste, la’ós ba lee de’it maibé oinsá atu hasa’e ita-nia koñesimetu liuhusi edukasaun no promove ita-nia kreatividade no abilidade sira-ne’ebé ita iha atubele dezenvolve ,” nia dehan.
Kirsty Sword Gusmão kongratula funsionáriu, dirijente no ema hotu ne’ebé fó apoia ba Sala Leitura durante ne’e, nune’e ho aniversáriu ne’e bele kontinua halo misaun edukativa sira hodi ajuda foin-sa’e timoroan liuhusi lee.
“Husu ba ita hotu atu kotinua apoia Sala Leitura Xanana Gusmão hodi haburas edukasaun ba ita-nia oan sira liuhusi hametin kultura lee iha ita-nia sosidade hodi ita dezenvolve-an,” nia tenik.
Jornalista : Natalino Costa
Editora : Julia Chatarina
