iklan

EKONOMIA, HEADLINE

Governu sei estabelese ajénsia ida hodi jere kabu submarinu

Governu sei estabelese ajénsia ida hodi jere kabu submarinu

Tékniku sira dada fiu kabu submarinu fibra ótika iha seremónia selebrasaun entrega ‘Golden Buoy’ no instalasaun dahuluk kabu submarinu fibra ótika, iha Tasi-ibun Bebonuk, segunda (24/06/2024). Imajen Tatoli/António Daciparu

DILI, 24 juñu 2024 (TATOLI)—Governu liuhusi Ministériu Transporte no Komunikasaun (MTK) ba oin sei estabelese ajénsia ida hodi jere kabu submarinu fibra ótika iha Timor-Leste, ne’ebé hahú ona instalasaun ba koneksaun kabu husi Bebonuk-Dili bá Darwin ho distánsia kilómetru 607.

“Agora ita iha ona diskusaun no halo preparasaun sei estabelese ajénsia ida hodi jere ba fibra ótika ne’e, ajénsia ne’e bele estatál ka sosiedade anónima ida atubele haree kabu submarinu ne’e,” Ministru Transporte no Komunikasaun, Miguel Marques Gonçalves Manetelu, hateten iha Bebonuk, hafoin serimónia selebrasaun entrega ‘Golden Buoy’ no instalasaun dahuluk kabu submarinu fibra ótika, iha Bebonuk.

Iha fatin hanesan, Diretór Nasionál Infraestrutura no Komunikasaun, Ambrosio Amaral, hateten, Diresaun Nasionál Infraestrutura no Komunikasaun (DNIK) implementa polítika husi Governu, enkuantu atu jere ligasaun internasionál ne’e husi parte MTK mak deside.

Notisia relevante : Empreza entrega ona obra CLS kabu fibra ótika iha Bebonuk ba Governu

Nia konsidera, lansamentu instalasaun infraestrutura ne’e nu’udar pasu pozitivu ba Timor-Leste tanba ligasaun internet sempre sai preokupasaun públiku.

“Ohin hahú ona halo instalasaun iha Timor-Leste, ba oin kontinua fali Austrália nia prosesu durante fulan-tolu, hahú ohin sei ramata iha agostu 2024, hotu sei halo teste ba rezultadu kabu subarinu maibé molok ramata tinan ne’e ita bele utiliza ona fibra ótika ne’e rasik,” nia tenik.

Prezensa kabu submarinu sei sai hanesan fonte reseita ba Estadu tanba ninia objetivu loloos ne’e atu rezolve ba liña internet, entaun bainhira instalasaun ba kabu ne’e ramata Governu bele fa’an fali ba opeardór telekomunikasaun sira.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!