iklan

EKONOMIA, HEADLINE, MUNISÍPIU, OÉ-CUSSE (RAEOA)

Abitante afetadu 16 iha Masin Oé-Cusse sei kolabora ho Governu

Abitante afetadu 16 iha Masin Oé-Cusse sei kolabora ho Governu

Autoridade RAEOA liuhusi serbisu tékniku husi Sekretariu Rejionál ba Asuntu Terra no Propriedade, hamutuk ho Sekretária Agrikultura Floresta no Pekuária no Diresaun Rejonál Infraestrutura, segunda ohin hala’o dialógu ho komunidade afetadu ba alargamentu estrada foun bairru Masin, iha sede suku Costa sub-rejiaun Pante Makasar. Imajen Tatoli/Abílio Elo Nini

OÉ-CUSSE, 24 juñu 2024 (TATOLI) – Komunidade afetadu uma-kain 16 iha bairru Masin, aldeia Sanane, suku Costa, sub-rejiaun Pante Makasar, Rejiaun Administrativa Espsiál Oé-Cusse Ambeno (RAEOA), promete hodi kolabora ho Governu atu kontinua estrada foun husi bairru Palaban liga ba Masin ne’ebé paradu dezde 2016 to’o agora seidauk iha kontinuasaun.

Tán ne’e, iha segunda ohin, serbisu tékniku husi Sekretáriu Rejionál ba Asuntu Terra no Propriedade, hamutuk ho Sekretária Agrikultura Floresta no Pekuária no Diresaun Rejonál Infraestrutura, hala’o diálogu aberta ho komunidade afetadu, kona-bá prosesu kontinuasaun.

“Diálogu ohin ne’e di’ak, maibé ha’u husu lalika halo tuir Governu anteriór, mai lohi de’it ami, sukat ona ami-nia rai, dehan atu selu, segundu atu mai sukat fila-fali, ha’u lakohi lori forsa atu ameasa tán povu hanesan uluk, sukat de’it importante kolabora ho rai na’in, tanba ami tenke hatene ami-nia nia medida,” José da Cunha nu’udar abitante lokál, ko’alia iha ámbitu diálogu, hala’o iha sede suku Costa.

Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA

Nia relembra, problema rai akontese kedas iha inísiu 2015, maske Prezidente Autoridade dala haat ona, maibé estrada ne’ebé alarga ho medida metru 500-resin seidauk rezolve tanba presiza indemnizasaun.

“Ha’u-nian mak ne’e de’it, Estadu bele foti ami-nia rai, maibé mak ne’e, kada metru kuadradu selu ho $5, ha’u la’ós lakohi fó maibé tenke konsidera no labele bosok ami hanesan uluk, tanba rai ne’e uluk kedas ha’u-nian,” nia rekomenda.

Fatin hanesan, komunidade afetadu António Bobi, reforsa-tán, rai ne’ebé halo ona estrada iha bairru Masin hosi liga bairru Palaban kuaze konklui ona, maibé seidauk halo indemnizasaun ba rai na’in-sira.

“Sei ami taka karik, estrada ne’e ami la fó atu halo konstrusaun, agora nahe ona alkatroada, buat hotu halo ona maibé bainhira mak selu ami-nia rai, ami koopera mak ami fó ba Estadu halo dezenvolvimentu, ne’ebé ami husu konsidera ami-nia rai,” nai dehan.

Notísia relevante:Autoridade RAEOA hahú rekolla dadus hafoin halo pagamentu ba komunidade afetadu projetu ZEESM

Hatán ba rekomendasaun sira-ne’e, Diretór Terra Propriedade, Julio Coel, esplika, ekipa tékniku komposta husi Terra Propriedade, Agrikultura no Obra Públika sei halo levantamentu dadus hodi hato’o ba autoridade ba prosesu indemnizasaun.

“Estrada dezde 2016, ne’e mak ohin ami mai iha ne’e, atu ko’alia didi’ak ho sira, buka solusaun atu fó tempu mai ami atu halo levantamentu dadus, atubele aprenzenta ba superiór sira, atu haree no hola desizaun liu-liu ba direitu kompensasaun,”nia akresenta.

Nia hateten, rezultadu enkontru ne’e, komunidade sira koopera, entaun iha tempu badak ekipa tékniku sei tuun ba terrenu atu halo levantamentu dadus, atu hatene uma-kain hira mak afeta, medida rai, plantasaun no uma,

“Ami identifika fila-fali tanba autoridade anteriór entrega ona materiál balu ba afetadu sira, no balu iha ona desizaun rai troka rai, tuir dadus iha abitante 16 mak sai afetadu, ne’ebé ita sei identifika fila-fali atu hatene loloos,” nia fó-sai.

Diálogu ne’e lidera husi xefe suku Costa, Francisco Colo, ho objetivu atu promove diskusaun aberta entre komunidade afetadu ho Autoridade atu buka solusaun ho di aselera prosesu dezenvolvimentu.

“Bainhira obra ruma afeta ba komunidade nia rikeza hanesan, rai, plantasaun, uma no fasilidade seluk,  presiza valoriza, ida-ne’e mak ha’u hanesan xefe suku, ha’u nia kna’ar ne’e atu hato’o komunidade nia sentimentu ne’e oinsá, no ha’u lori fali informasaun ne’ebé konstrutivu husi parte Governu ba iha komunidade ne’e rasik, atu labele hamosu dezentendimentu entre komunidade no Governu,” nia dehan.

Notísia relevante: Komunidade afetadu Samoro espera Autoridade RAEOA rezolve rezidénsi Fulolo

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!