OÉ-CUSSE, 14 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretáriu Rejionál ba Asuntu Terra no Propriedade, tersa ne’e hahú rekolla dadus komunidade sira-ne’ebé durante ne’e afeta iha implementasaun grande projetu Zona Ekonómia Espesiál Sosiál Merkadu (ZEESM) atu prepara halo pagamentu iha tinan ne’e.
Notísia relevante: Autoridade RAEOA sei rekolla dadus afetadu ZEESM atu halo kompensasaun
Sekretáriu Rejionál ba Asuntu Terra no Propriedade, Marcelino Marques Coro, esplika, atividade rekolla dadus ne’e ba suku rua, Costa no suku Cunha, liuhusi karta koñesimentu ba autoridade lokál sira, atu informa ba komunidade atu mai kompleta dokumentu hanesan sasin, balu muda hela fatin no balu mate ona.
“Agora sira mai direita, hodi kompleta dokumentu dalaruma balu hela dook, maibé xefe suku ho xefe aldeia aprosima sira tenke mai, tanba ita fó oportunidade ba sira atu halais, bainhira dokumentu sira-ne’e kompleta ona, laiha ona reklamasaun ruma, ita kontinua faze publikasaun, no hein deliberasaun ne’ebé iha ita bele publika iha Jornál Repúblika, mak foin prosesa ba pagamentu,” Marcelino Marques Coro, ba jornalista sira iha Oé-Cusse, ohin.
Nia esplika, objetivu rekolla dadus ne’e, atu evita erru iha ámbitu pagamentu, tan ne’e dokumentu presiza kompletu laiha ona problema, sei anunsia fila-fali tanba naran balu sala, dokumentu eleitorál no balu mate ona, balu muda ona hela fatin, entaun tenke haloos hotu mak foin halo pagamentu.
“orsamentu tama ona iha konta bankária suku Costa iha rihun $200-resin, iha suku Cunha rihun $75-resin, valór ne’e autoridade anteriór mak prevee kedas, kada metru-kuadradu dollar $3,00, bazea dekretu-lei ne’ebé autoridade sesante halo ona, no ami sei kontinua selu tuir baze ida-ne’e,” nia katak.
Notísia relevante:OJE 2024, RAEOA seidauk ezekuta kapitál menór no kapitál dezenvolvimentu
Aguntinho da Costa, nu’udar portavós ba komunidade afetadu suku lima iha sub-rejiaun Pante Makasar, relembra problema afetadu komesa kedas iha 2016 to’o ohin loron, Governu anteriór seidauk selu ba alargamentu estrada, sentrál elétrika Sakato, otél Ambeno, aeroportu Palaban no rezidénsia Fulolo.
“Ida-ne’e ami mai iha-ne’e, atu mai iha terra propriedade atu kompleta administrasaun nian, atu selu ami, ne’e duni ami husu Autoridade RAEOA foun lidera husi maun Rogério Lobato, tau prioridade hodi selu povu nia sasán, uma, rai tanba ai-horis balu selu ona no balu seidauk,” nia espera.
Notísia relevante:RAEOA prepara ona deliberasaun paga rai afetadu ZEESM
Atu rekorda fali katak, iha mandatu Autoridade anteriór, halo ona pagamentu, tuir rezolusaun Governu ho númeru 20/2014, bazea ba rezolusaun Autoridade RAEOA nian, númeru 2/2023, loron 24 fevereiru, ho valór másima, metru-kuadradu másima dollar $3,00, alvu ba deklarante na’in-1.192 ho nia orsamentu hamutuk millaun $1.6.
Jornalista: Abílio Elo Nini
Editór: Evaristo Soares Martins
