DILI, 25 juñu 2024 (TATOLI)—Diretór Jerál, Arkivu Nasionál Timor-Leste, Institutu Públiku (ANTL, I.P) koopera ho Ajénsia Tekonolojia Informasaun no Komunikasaun Timor, Institutu Públiku (TIC Timor, I.P) tinan ne’e atu dijitaliza dokumentu istóriku sira.
“Daudaun ne’e, parte TIC Timor nian hahú mai ami-nia fatin hodi hahú monta ekipamentu instalasaun liña internet nian no semana ne’e sira sei mai aprezenta materiál saida mak ami presiza sosa ba iha dijitalizasaun ne’e no sira update mós ami-nia server sai padraun, ho prosesu sira ne’e hotu ita garante tinan ne’e sei halo dizitalizasaun ba dokumentu istóriku sira,” Diretór Jerál ANTL, I.P, Fernando de Sousa, informa ba Agência Tatoli, iha ninia knaar fatin, Caicoli, tersa ne’e.
Notisia relevante : ANTL koopera ona TIC Timor hodi dijitaliza dokumentu istóriku
Dijitalizasaun ba dokumentu istóriku ne’e importante tebes tanba dokumentu sira durante ne’e rai manuál de’it nune’e bainhira akontese buat ruma labele salva.
ANTL,I.P tinan ne’e aloka orsamentu hamutuk $1.080.000, ne’ebé husi orsamentu ne’e balun sei uza hodi estabelese sistema arkivu no seluk sei harii sala akollamentu.
Jornalista : Arminda Fonseca
Editora : Julia Chatarina
