Sarani sira iha Dili la’o-ain ba Tasi-Tolu partisipa misa solene
DILI, 25 juñu 2024 (TATOLI)–Sarani sira ne’ebé pretense ba parokia Dili nian sei la’o ain hanesan halo peregrinasaun ba Tasi-Tolu hodi partisipa misa solene ne’ebé Papa Francisco prezide iha 10 setembru 2024, iha tuku 16h00 lorokraik,
Notísia Relevante: Papa Francisco sei prezide misa solene iha Tasi-Tolu iha 10 setembru
“Sira-ne’ebé pertense iha parokia Dili nian sei la’o peregrinasaun, kada parokia sei organiza hodi halo kamiñada espiritual hamutuk hodi partisipa misa”, Vise Koordenadór ba Vizita Papa hosi Igreja no atual Pároku Igreja Santo António Motael, Guilhermino da Silva, hateten ba Agência Tatoli liuhosi “Entrevista Eskluziva” ho topiku “Preparasaun Igreja ba Vizita Papa Francisco”, iha Faról, segunda 24 juñu 2024) ne’e.
Ba sarani sira-ne’ebé hela iha Dili ida-idak hela iha nia uma no sarani sira husi Ataúro no postu administrative Metinaro ne’e sei mai iha Dili antes kedas.
“Sira sai dadeersan hosi uma hodi partisipa misa iha Tasi-Tolu, tanba oras ida antes, ema hotu iha laran atu prepara no konsentra nia aan ba misa. Molok Papa Francisco tama iha Tasi-Tolu, ema hotu hakmatek no hamutuk ona iha fatin misa nian ne’e,” nia dehan.
Iha loron 10 setembru 2024, ba selebrasaun misa solene iha Tasi-Tolu sei laiha movimentu transporte públiku halo movimentu ba-mai iha kapitál.
Tuir nia, sarani sira hosi dioseze Dili, baucau no Maliana ne’ebé hela iha fatin konsentrasaun ne’ebé Governu prepara ne’e, kamioneta mak sei tula sira ba to’o fatin misa nian iha Tasi-Tolu.
Nia apela, atu sarani hotu-hotu tenke lori ida-idak nia hahan ka bukae hodi han meudia nian no kalan nian, tanba misa sei hahú tuku haat (16h00) no sei termina iha tuku 18h00 kalan hanesan ne’e.
“Sarani sira labele kaer tersu de’it. Tersu ne’e importante maibé tenke lori bukae hodi bele kalsu stomagu ne’ebé mamuk,” nia hateten.
Governu sei prepara fatin ba sarani sira husi munisipiu
Governu no igreja Timor-Leste fasilita fatin ba konsentrasaun sarani sira husi munisipiu ka dioseze Baucau, dioseze Maliana no munisípiu balun husi dioseze Dili hanesan Manufahi, Ainaro no Aileu ne’e, Governu no igreja sei prepara hela fatin konsentrasaun iha Hera, Beduku no Ulmera Tibar-Liquiça.
“Governu hatudu ona fatin. Dioseze Maliana iha Tibar. Husi Baucau iha Hera no Dili husi Aileu, Ainaro no Manufahi iha Beduku. Governu sei prepara iha fulan-jullu nia laran hodi hamoos no hatetuk liuliu monta tenda ba sarani sira-ne’e,” nia hateten.
Nia esplika, sarani sira husi munisipiu sira-ne’e sei tun mai Dili, iha loron 09 setembru.
Jornalista : Jesuína Xavier
Editór : Cancio Ximenes
