DILI, 26 juñu 2024 (TATOLI) – Reuniaun Konsellu Ministru, kuarta ne’e, iha Palásiu Governu Dili halo diskusaun ba planu Ministériu Finansa (MF) kona-ba planu atu aumenta kapasidade Ministériu nian hodi fó apoiu ba instituisaun estatál sira hotu kona-ba jestaun finansa públika .
Planu ne’e aprezenta husi Ministra Finansa, Santina José Rodrigues F. Viegas Cardoso.
“Planu ne’e ho objetivu atu aumenta kapasidade Ministériu nian hodi fó apoiu ba instituisaun estatál sira seluk iha jestaun efisiente finansas públikas nian,” tenik iha nota ne’ebé Agência TATOLI asesu husi edia Gabinete Primeiru-Ministru.
Hahú hosi ninia kriasaun durante administrasaun ONU nian iha tinan 2001, Ministériu Finansas Timor-Leste dezenvolve ona ninia kapasidade hodi apoia instituisaun estatál sira seluk iha jestaun finansas públikas.
Planu Tinan-Lima ne’e la reflete de’it progresu sira ne’ebé alkansa ona, maibé ko’alia mós kona-ba dezafiu sira ne’ebé mosu hanesan rekuperasaun pós-pandemia COVID-19 no impaktu husi dezastre klimátiku, ne’ebé foka-liu ba nesesidade atu hametin sistema finanseiru públiku hodi promove dezenvolvimentu sustentável no reziliénsia ekonómika iha Timor-Leste.
Alende ne’e, Ministra Finansa Santina Cardoso aprezentan mós ba KM kona-ba kalendáriu reuniaun Komité Revizaun Orsamentál nian, iha ámbitu preparasaun Orsamentu Jerál Estadu ba tinan 2025. Reuniaun ne’e sei hahú husi loron 12 to’o 17 fulan-agostu tinan 2024.
Jornalista: Hortencio Sanchez
Editór: Florencio Miranda Ximenes
