ZEEDOA konsulta entidade Oé-Cusse ba relatóriu finál no estabelese PED 2030

OÉ-CUSSE, 25 juñu 2024 (TATOLI) – Ekipa Zona Ekonomia Espesiál Dezenvolvimentu Oé-Cusse Ambeno (ZEEDOA), lideradu João Mendes Gonçalves, tersa ne’e realiza workshop hodi konsulta entidade sira iha nível rejionál no Governu Sentrál ba esbosu finál kona-bá relatóriu estadu dezenvolvimentu rejiaun no estabelesimentu Planu Estratéjiku Dezevolvimentu (PED) 2025-20230 iha Rejiaun Administrativa Espesiál Oé-Cusse Ambeno (RAEOA).

“Relatóriu Estadu Rejiaun prontu ona, agora ami halo worshop ne’e atu hetan imput finál ona, rona parseiru dezenvolvimentu, entidade instituisaun sira, setór privadu, sosiedade sivíl no vetaranu sira, atu hetan sira-nia hanoin kona-bá saida mak presiza atu envolve tan iha relatóriu ne’e, molok ita lori ba Konsellu Ministru,” João Mendes Gonçalves, ko’alia iha otél Ambeno Oé-Cusse.

Notísia relevante: ZEEDOA hahú elabora relatóriu Estadu Rejiaun ba turizmu no fronterístika

Eis-Ministru Ekonomia ne’e hateten, bainhira relatóriu ne’e remata, parte ZEEDOA kontinua prepara kedas ba iha estabelesimentu PED) tinan lima nia, 2025 to’o 2030.

Tanba preparasaun planu ne’e, envolve kedas nia projesaun orsamentál tinan-lima nian, no define kedan Planu Asaun Anuál tuir prioridade ho nia orsamentu kada tinan, nune’e iha fulan-setembru bele submete ba iha Primeiru Ministru atu aprezenta iha Konsellu Ministru.

“Depoizde prontu ona, ita sei haree prioridade sira-ne’ebé atu hala’o iha tinan dahuluk halo saida, tinan daruak halo tán saida to’o tinan lima, tanba kada tinan tenke halo saida,” nia dehan.

Nia informa, bainhira planu estratéjiku ne’e termina sei prepara enkudramentu legál, no sei aprova iha Parlamentu Nasionál, kona-bá estabelesimentu Zona Ekonomia Espesiál Dezenvolvimentu Oé-Cusse Ambeno (ZEEDOA).

“Agora ha’u rekruta asesór área jurídika ida, atu prepara lei enkuadramentu legál ne’e, uluk nia serbisu ona iha Parlamentu Nasionál, ne’ebé nia espesialista iha preparasaun ba lei sira-ne’e, ha’u lori mai ho jurista ida, sira sei serbisu hamutuk, iha setembru bele aprezenta ona ba Ministru, no planu ordenamentu territóriu Oé-Cusse, ne’ebé uluk halo ona, ami sei halo revizaun no atualizasaun ba planu ida-ne’e,” nia dehan

Notísia relevante: PM Xanana husu Autoridade RAEOA no ZEEDOA jere osan povu ho didi’ak

Prezidente Autoridade RAEOA, Rogério Tiago Lobato, agradese Governu hili atu lidera RAEOA no ZEEDOA, mai espiritu misaun atu hadi’a no dezenvolve Oé-Cusse, ba futuru bele sai referénsia dezenvolvimentu ba munisipíu sira seluk.

“Ha’u kontente tanba konvida ema barak mai iha ne’e mezmu sira mai husi partidu ne’ebé de’it, ideia sira-ne’ebé atu fó iha konsultasaun ohin, atu hadi’a rai ida-ne’e, ita tenke simu envolve iha relkatóriu ne’e, labele haree ba parte negativu maibé haree ba nia impaktu pozitivu ba futuru,”  nia akresenta

Notísia relevante: ZEEDOA fahe informasaun estudu tékniku ho pontu fokál kona-bá relatóriu Estadu Rejiaun

Jornalista: Abílio Elo Nini

Editór: Evaristo Soares Martins