Labarik feto 2.336 iha Aileu sei simu vasina HPV
DILI, 27 juñu 2024 (TATOLI)–Labarik estudante feto ho idade entre 11 no 14 iha munisípiu Aileu ho totál hamutuk 2.336, sei simu vasina Human Papillomavirus (HPV) atu prevene moras kankru serviks ka kankru kolu úteru.
Notísia Relevante: UNICEF hatama ona vasina kontra HPV doze 41.200 ba Ministériu Saúde
“Husi totál númeru ne’e, iha postu administrativo Aileu Vila hamutuk 1.048 ne’e husi eskola 19. Estudante feto 496 husi eskola 11 iha Remexiu, estudante 454 husi eskola sia (9) iha Laulara no estudante 339 husi eskola 10 iha Lekidoe,” Diretór Servisu Saúde munisipiu Aileu, João de Jesus, hateten ba Agência Tatoli liuhusi telefónika, kinta ne’e.
Nia hateten, estudante sira-ne’ebé elejivel atu simu vasina HPV ba prevensaun moras kolu úteru mak estudante sira hosi klase neen to’o sia hosi eskola sira-ne’e.
“Ita sei realiza enkontru ida ho inan aman sira, autoridade lokal no estudante sira molok ita implementa vasina HPV. Ita iha estudanteshamutuk 2.336,” Diretór Saúde munisipiu Aileu ne’e hateten.
Tuir nia, dadus ida ne’e sei provizóriu husi kada eskola maibé seidauk konta ho labarik sira ne’ebé la eskola.
Nune’e, servisu saúde munisípiu Aileu sei servisu hamutuk ho autoridade hotu atu halo kampaña jerál ida, nune’e populasaun hotu bele hatene kona-ba vasina ne’e.
Kampaña ne’e atu hasa’e koñesimentu populasaun nian kona-ba importánsia husi vasina HPV ba labarik feto sira oinsá prevene kankru serviks iha futuru.
“Semana ida-ne’e ita hahú enkontru ho xefe sentru saúde, xefe aldeia no suku inklui Administradór postu sira,” nia dehan.
Tuir planu, Ministeriu Saúde sei halo vasina HPV sei lansa iha munisipiu Ermera iha komemorasaun loron nasionál saúde.
Notísia Relevante: Labarik feto rihun 13 iha Liquiça sei simu vasina HPV
Jornalista : Jesuína Xavier
Editór : Cancio Ximenes
