PN sei bolu Governu atu esplika preparativu simu Papa Francisco
DILI, 27 juñu 2024 (TATOLI)—Parlamentu Nasionál (PN) sei bolu Governu liuhusi komisaun organizadora bele halo esplikasaun kona-ba preparativu atu simu Papa Francisco hala’o vizita Estadu no pastorál iha Timor-Leste durante loron tolu, hahú husi 09 setembru to’o 11 setembru 2024 nian ne’e.
Notísia Relevante: Papa Francisco sei vizita Timor-Leste iha 09-11 setembru 2024
Segundu Vise Sekretária Meza Parlamentu Nasionál (PN), Maria Teresa Gusmão, hateten ohin reuniaun reuniaun lidér bankada Parlamentár ne’ebé lidera direta husi Prezidente Parlamentu no partisipa husi bankada Parlamentár sira, diskute atu tau ajenda hodi konvida Governu liuhusi komisaun organizadora atu bele mai esplika preparativu sira atu simu Papa Francisco.
“Hanoin atu bolu komisaun organizadora husi Governu atu mai iha Parlamentu, esplika lala’ok preparasaun ba simu vizita Amu Papa to’o iha ne’ebé ona. Protokolu ba serimónia Amu Papa mai ne’e la’o oinsá, teknikamemte no preparasaun oinsá iha parte hotu-hotu, hanesan liturjia no seluk tan. Ho nune’e, Parlamentu mós hatene preparasaun no lala’ok vizita Amu Papa ni’an iha Timor-Leste,” nia hateten ba jornalista sira hafoin ramata enkontru ho líder bankada iha sala konferénsia Parlamentu, kinta ne’e.
Nune’e, nia dehan, PN sei hato’o karta pedidu ba Governu antes hodi bele Governu prepara iha tempu hodi bele mai Parlamentu.
Tan ne’e, tuir planu, meza Parlamentu Nasionál (PN) iha tempu badak sei haruka karta pedidu ba Governu.
Notísia Relevante: Papa Francisco sei hasoru malu ho juventude 3.000 iha 11 setembru
Jornalista : Nelson de Sousa
Editór : Cancio Ximenes
