PN sei hato’o hikas pedidu ba Ministra Saúde hala’o debate kona-ba saúde
DILI, 27 juñu 2024 (TATOLI)—Parlamentu Nasionál (PN) sei hato’o hikas pedidu hodi konvida Ministra Saúde (MS), Elia dos Reis Amaral, hodi hala’o debate ko’alia kona-ba área saúde iha Timor-Leste.
Notísia Relevante: Ohin, PN adia debate ho Ministra Saúde
Segundu Sekretária Meza PN, Maria Teresa Gusmão, hateten ohin reuniaun líder bankada parlamentár ho Prezidente Parlamentu Nasionál ko’alia ajenda importante atu konvida Ministra Saúde hodi halo debate iha área saúde nian.
“Asuntu saúde ne’ebé mak oras ne’e sai polémika barak tebe-tebes iha mídia ita akompaña, entaun ita atu hatene loloos situasaun ne’e mak oinsá, Parlamentu hanoin atu bolu Ministra Saúde atu bele mai iha Parlamentu Nasionál hodi ita bele rona asuntu problema sira-ne’e, nia progresu no dezáfiu la’o oinsá. Problema saida-saida mak akontese iha Ministériu Saúde, atu nune’e ita bele hatene Ministériu Saúde nia preparasaun to’o iha ne’ebé ona,” nia hateten ba jornalista sira iha resintu Parlamentu, kinta ne’e.
Tan ne’e, nia dehan, sei deside data fiksu hodi tau iha ajenda, nune’e iha semana ida ka rua tan ne’e, antes 15 jullu, hein katak governante iha área tutela ne’e bele iha tempu atu hodi bele mai iha Parlamentu Nasionál.
Nune’e, PN iha sei karuka karta pedidu ba Primeiru-Ministru (PM) hodi bele autoriza Ministra Saúde mai iha iha PN.
Enkuantu, tuir konstituisaun iha artigu 92 (Definisaun) Parlamentu Nasionál mak órgaun soberania repúblika Timor-Leste nian ne’ebé reprezenta ema timoroan tomak, iha kbiit atu halo lei, atu fiskaliza no atu halo desizaun polítika.
Tuir rejimentu PN nian, bainhira deputadu sira levanta beibeik preokupasaun iha área saida de’it bele mós bolu direta membru Governu iha área tutela hodi halo debate, atu bele hatene polítika no medida saida mak buka solusiona ba preokupasaun ne’ebé iha.
Enkuantu, PN bolu Ministra Saúde hodi halo debate tanba iha reuniaun plenária iha loron segunda-tersa kada semana ne’e, Deputadu sira sempre hato’o preokupasaun iha área saúde hanesan menuus ai-moruk no menus profisionál saúde sira atu atende pasiente sira.
Jornalista : Nelson de Sousa
Editór : Cancio Ximenes
