iklan

EKONOMIA, HEADLINE, MUNISÍPIU, OÉ-CUSSE (RAEOA)

Rogério Lobato sei aumenta voo entre Dili-Oé-Cusse kada semana dala tolu

Rogério Lobato sei aumenta voo entre Dili-Oé-Cusse kada semana dala tolu

Prezidente Autoridade Rejiaun Administrativa Espesiál Oé-Cusse Ambeno, Rogério Tiago Lobato. Imajen Tatoli/Francisco Sony

OÉ-CUSSE, 27 juñu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, promete sei aumenta voo aviaun Aero Dili nian iha semana ida bele semo ba mai dala-tolu entre Dili Oé-Cusse iha loron segunda, kuarta no sesta-feira.

“Iha fulan haat nia laran, ami labele halo milagre maibé buat-ne’ebé ita halo ne’e, boot tebes, ita lori aviaun ida, semo Dili Oé-Cusse, oras ne’e aviaun ba mai ho pasajeiru nakonu, semo dalarua, iha semana ida, agora ha’u esforsa atu semo dala tolu, segunda ho kuarta no sexta-feira,” Rogério Tiago Lobato, hato’o nia promesa ne’e ba entidade sira iha otél Ambeno, tersa ne’e.

Notísia relevante: Atoni-oan sira kontente ho operasaun Aero Dili

Tuir Prezidente Autoridade katak, daudaun ne’e aviaun semo dalarua kada semana, iha loron segunda no sesta-feira.

“Agora ita fó oportunidade no liberdade ba Oé-Cusse oan no timoroan hotu atu hili, hakarak ba Díli lalais sa’e aviaun, sé mak osan ladún barak bele sa’e ró,” nia akresenta.

Eis-Ministru Interiór ne’e, informa mós iha tempu badak sei fasilita tán transporte terrestre loke travel ida ho baze espesiál husi Oé-Cusse ba Dili no espesiál kompleta buat hotu iha laran atu fasilita povu Oé-Cusse atu labele preokupa ba transporte.

“Maibé ho osan uitoan ne’ebé ita iha, ita bele halo buat barak, importante mak ne’e tenke hatene gasta osan,” nia dehan.

Notísia relevante: Primeiru Ministru lansa voo dahuluk aviaun Aero Dili ba Oé-Cusse

Rekorda, iha loron 18 fulan maiu semana kotuk, Primeiru Ministru Kay Rala Xanana Gusmão, hamutuk ho Prezidente Autoridade RAEOA, Rogério Lobato, no na’in ba Aviaun Aero Dili, Lorenço de Oliveira, lansa ona primeiru voo dahuluk Dili-Oé-Cusse ho presu billete $20 no Oé-Cusse ba Dili ho presu $22.

Jornalista: Abílio Elo Nini

Editór: Evaristo Soares Martins  

iklan
iklan

Leave a Reply

iklan
error: Content is protected !!