OÉ-CUSSE, 24 maiu 2024 (TATOLI) – Pasajeiru Quintiliano Ase, sente kontente hafoin viajen ho aviaun Aero Dili, sesta ohin, husi Dili ba Oé-Cusse hodi pasa ferias no vizita família sira iha Rejiaun Administrativa Espesiál Oé-Cusse Ambeno (RAEOA).
Notísia relevante: Primeiru Ministru lansa voo dahuluk aviaun Aero Dili ba Oé-Cusse
Quintiliano Ase, nu’udar Oé-Cusse oan hanesan mós funsionáriu no hala’o hela serbisu iha Parlamentu Nasionál (PN), sente orgullu tanba uza loron-sábadu bo domingu bele ferias ho família iha Oé-Cusse no sei viajen iha segunda dadeersan ho aviaun Aero Dili.
“Ha’u sente kontente tanba viajen lato’o menutu 30 ita to’o ona fatin, mai ha’u ida-ne’e orgullu, tanba viajen la komplikadu la’o di’ak tebes, bele ami mai to’o Oé-Cusse mai ferias ho família iha ne’e aban no domingu, bele fila-fali, ne’ebé ha’u senti kontenti mai ho Aviaun Aero Dili,” Quintiliano Ase, ba jornalista sira hafoin tún iha aeroportu Rota do Sândalo Oé-Cusse.
Atoni-oan ne’e agradese ba Governu Timor-Leste no Aero Dili, tanba bele fasilita apoia konetidade Dili ba Oé-Cusse viajen la to’o menutu 30 no atendimentu seguru ho profisionál.
“Desde tama mai simu ami ho atendimentu di’ak no laiha burokrasia, ha’u sente seguru, tan ne’e ita tenki ha’u agradese ba Governu no aviaun Aero Dili, tanba bele fasilita voo ne’e ho lais liu no seguru liu, fasilita tebes ita,” nia orgullu.
Notísia relevante: RAEOA-ANATL selebra akordu ba operasionál aeroportu Rota do Sândalo
Asesór Aviasaun no apoia Gabinete iha Prezidente Autoridade RAEOA, Nídio Lobato, esplika, iha primeiru voo regulár kuaze pasajeiru barak mak entusiazmu hodi viajen ho aviaun Aero Dili, tanba ba mai tula pasajeiru ema na’in-150 liu.
“Ohin primeiru voo regulár kuaze semana ida dalarua, ohin ita hetan pasajeiru barak, povu Oé-Cusse no estranjeiru balu husi Portugál no Xina entusiazmu, mai husi Dili pasajeiru nakonu 152, no husi Oé-Cusse ba Díli mós 150, tan ne’e ita agradese ba Autoridade RAEOA no povu Oé-Cusse nia apoia, atu halo programa ida-ne’e atu realiza konetidade husi Dili Oé-Cusse no Oé-Cusse ba Díli,” nia informa.
Tuir nia kona-bá fasilidade, iha aeroportu Rota do Sândalo, sufisiente iha buat balu presiza apoia, tanba fasilidade balu seidauk di’ak, maibé iha ona prosesu aprovizionamentu ba tenderizasaun hodi halo manutensaun, maibé kona-bá atendimentu garantidu.
“Ha’u labele dehan 100%, maibé iha loron hirak-ne’e ita akompaña, ekipa tékniku sira preparadu kona-bá atendimentu sira hotu hahú husi inisíu hatudu profisionál no respeita durante atendimentu ba pasajeiru sira ho di’ak,” nia katak.
Notísia relevante:Aero Dili troka aviaun ZEESM semo bá Oé-cusse
Atu rekorda fai katak, iha loron 18 fulan maiu semana kotuk, Primeiru Ministru Kay Rala Xanana Gusmão, hamutuk ho Prezidente Autoridade RAEOA, Rogério Lobato, no na’in ba Aviaun Aero Dili, Lourenço de Oliveira, lansa ona primeiru voo dahuluk Dili-Oé-Cusse ho presu billete dolár $20 no Oé-Cusse ba Dili ho presu dolár $22.
Jornalista: Abílio Elo Nini
Editór: Evaristo Soares Martins
