Top

Membru PN apoiu KFP halo reforma iha administrasaun públika

Uma Fukun Parlamentu Nasionál. Imajen/Espesiál

DILI, 27 juñu 2024 (TATOLI)—Membru Parlamentu Nasionál (PN) liuhusi Deputadu bankada CNRT, Ricardo Baptista, apoiu Komisaun Funsaun Públika atu halo reforma iha administrasaun públika bazeia ba rezultadu diagnóstiku ne’ebé iha.

Notísia Relevante: Membru PN husu KFP aselera prosesu lei reforma obrigatóriu ba FP

“Hanoin kona-ba reforma administrasaun ne’ebé mak KFP atu halo, ida-ne’e planu ne’ebé mak di’ak,” nia hateten ba Agência Tatoli iha resintu Parlamentu, sesta ne’e.

Deputadu husi bankada Governu ne’e apresia ba serbisu KFP ne’ebé halo diagnóstika forsa traballu ba funsionáriu públiku ne’ebé buka hatene kona-ba forsa traballu iha liña ministeriál sira no aprezenta planu reforma administrasaun públika bazeia ba orientasaun Primeiru-Ministru (PM) nian.

Tanba iha diagnóstiku ne’e deteta lista prezensa tama tarde, seidauk kontrolu di’ak ba totál funsionáriu públiku nian, aleinde iha sistema funsaun públika naran SIGAP rejista funsionáriu hamutuk 37.000 maibé iha parte salariál nian rejista 50.000-resin mak kada fulan asesu ba saláriu.

Entre ministériu ida ho ministériu seluk ne’e ida-idak iha nia definisaun saláriu, no preokupasaun bo’ot seluk mak ajente administrasaun públika ne’ebé rekruta hela husi kada liña ministerial, tantu ajente administrasaun ka kazuál sira-ne’ebé mak laiha definisaun klara no ladún define funsaun loloos, montate salariál hira mak nia tenke hetan no seluk-tán.

“Hanoin kona-ba reforma administrasaun ida-ne’e planu ne’ebé mak di’ak, tanba hanesan ita hatete funsionáriu balun mak ladún serbisu no iha koñesimentu iha área sira-ne’ebé mak sira serbisu ba. Tan ne’e, hanoin planu ne’e, se Komisaun Funsaun Públika se haree tenke iha duni ona reforma administrasaun públika, presiza duni no tenke halo duni para funsionáriu sé de’it mak serbisu iha administrasaun públika. Sira tenke hatene nia kna’ar no tenke serbisu tuir padraun ne’ebé mak iha, atu nune’e bele fó asisténsia di’ak ba ita-nia komunidade no governasaun ka Estadu rasik,” nia hateten.

Nia dehan, liga ba sira-ne’ebé la tama iha sistema SIGAP funsaun públika maioria sira-ne’ebé kazuál, asesór, la’ós de’it foin iha tinan ida-ne’e maibé iha tempu ka tinan períodu sira kotuk mós, ida-ne’e akontese kada períodu sempre mosu, nune’e agradese ba KFP bele deteta ona ho ida-ne’e oinsá mak minimiza saida mak KFP bele haree solusiona.

Tuir nia, iha kada períodu sempre iha funsionáriu kazuál no asesór sira mós barak, ida-ne’e KFP halo nia serbisu di’ak atu bele haree deteta no hein katak KFP bele halo buat ruma redús ou buka dalan oinsá solusiona, nune’e períodu sira tuir mai bele banati tuir saida mak KFP agora daudaun iha.

“Ema-ne’e laiha koñesimentu serbisu, hanoin ne’e parte ekipa jurí mak tenke haree no KFP rasik sira mós iha ne’eba atu haree. Sidadaun sira-ne’ebé mak tuir rekrutamentu ruma, nia tenke iha tuir kriteira sira-ne’ebé tau ona, nune’e se pasa mak serbisu hatene ka laiha koñesimentu iha área ne’e. Hanoin, ekipa juri sira mós tenke husu fali ba sira, tanba saida mak sira halo rekrutamentu la haree ema ne’e katak nia iha duni kapasidade iha área ne’e,” nia dehan.

Antes ne’e, liuhusi reuniaun plenaria, Deputadu CNRT, Gabriel Soares, husu KFP atu aselera prosesu haree kona-ba lei reforma obrigatóriu ba funsionáriu públiku.

“Husu ba Governu atu aselera lei reforma obrigatóriu ba funsionáriu sira-ne’ebé mak idade ita haree katak, sira hein hela bainhira mak lei ne’e aprova para sira mós hakarak deskansa ona vida restu ne’ebé mak sira iha,” nia hateten.

Ba inan no aman sira ne’ebé sai hanesan funsionáriu públiku ho idade 60 ba leten ne’e barak no balun mate ona sein reforma ida no barak mós moras iha uma de’it, liuliu funsionáriu sira-ne’ebé hakna’ar aan iha instituisaun ne’ebé mak haree importante tebes.

Nia dehan, hanesan iha edukasaun barak tebes inan-aman ka funsionáriu públika sira hanesan manorin ne’ebé antigu ne’e balun hakaas aan ba nafatin hanorin maibé balun iha uma de’it ona.

Tanba ne’e, Vise Prezidente komisaun G ne’ebé trata asuntu Edukasaun iha PN ne’e dehan, balun diretór eskola sira atu halo jestaun fahe karga oráriu ne’e susar tebes, tanba sira-nia kondisaun moras, entaun nia prezudika saladeaula balun tenke mamuk tanba sira efetivu hela.

“Husu ba Governu no KFP, nune’e aselera mai Governu atu urjente atu haree ona lei  reforma ne’e obrigatóriu ne’e,” nia hateten.

Notísia Relevante: KFP sei aprezenta proposta-lei reforma obrigatóriu ba funsionáriu públiku

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!