BOBONARO, 28 juñu 2024 (TATOLI)-Primieiru Ministru (PM), Kay Rala Xanana Gusmão, akompaña husi Ministra Solidariedade Sosiál no Inkluzaun, Verónica Das Dores, hamutuk ho Embaxadora Portugal iha Timor-Leste, Manuela Barros, sesta ne’e inaugura sentru sosiál Padre Manuel Nunes Formigão ne’ebé lokaliza iha suku Tapo-Memo, postu administrativu Maliana, munisípiu Bobonaro.
Primeiru Ministru, Kay Rala Xanana Gusmao, lori governu nia naran agradese ba emprezáriu nasionál no internasionál no doadór sira husi rai-li’ur ne’ebé fó ona kontribuisaun sosiál hodi konstrui obra ne’e.
Edifísiu Sentru Sosiál Padre Manuel Nunes Formigão, suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.
Xanana konsidera estabelesimentu sentru ne’e bele ajuda governu eleva kualidade edukasaun iha Timor-Leste luliu forma labarik sira-nia karáter sosiál, intelijénsia no eleva sira-nia mentalidade atu aprende siénsia no língua portugués.
Notísia relevante: PM Xanana husu feto hotu haka’as-an iha serbisu saida de’it
“Agradese ba madre sira-ne’ebé tau atensaun ba labarik sira, ita ajuda malu hari nova jerasaun matenek hodi kontinua funu uluk nian no kontinua esforsu agora ba konstrusaun estadu. Ita fiar katak labarik sira sai husi ne’e, se no kazu ho mentalidade ne’ebé dignu tebes, ho hanoin ida-ne’ebé atu serbí rai, serbí povu hodi realiza sakrifísiu ne’ebé sira-nia avo sira mate iha funu laran,” Xanana hateten iha Tapo-Memo.
Ministra Solidariedade Sosiál no Inkluzaun, Verónica Das Dores, reforsa apoia hirak-ne’e importante no iha valór boot tebes ba konstrusaun nasaun no estadu Timor-Leste.
“Ne’e la fasil, Governu mesak labele, povu mesak labele, timoroan sira mesak mós labele, presiza apoiu husi rai-li’ur no rai-laran, ne’ebé mai ita hadi’a rai Timor ne’e sai nasaun ida nakonu ho prosperiedade, pas no inkluzaun ba loron aban bainrua,” nia hateten.
Prezidente Autoridade Munísipiu Bobonaro, Alexandrino Pires, orgullu no apresia ba esforsu ne’ebé madre sira husi Kongresaun Irmá Reparradora Nossa Senhora de Fátima halo tanba durante ne’e la sente kolen, atu halo misaun sosiál hodi apoia povu munisipíu Bobonaro, espesialmente povu suku Tapo-Memo.
“Imi-nia apoia ba povu Bobonaro, ha’u selu labele, ha’u tama iha fatin ida-ne’e ha’u matan-been monu, tanba ha’u rasik labele halo buat ida ke ho kualidade ida hanesan ne’e, tanba ha’u iha limitasaun, mas liuhusi imi-nia domin, halibur malu lori halo konstrusaun ida ke boot ho kualidade,” nia akresenta.
Prezidente Autoridade Bobonaro ne’e promete sei hamutuk ho autoridade postu administrativu Maliana no líder komunitária sira mobiliza labarik sira mai aprende iha sentru ne’e, tanba fatin ne’e bele prepara labarik sira-nia futuru.
“Aspeitu kualidade sai importante ba ita, liuliu munísipiu Bobonaro, tanba ne’e husu inan-aman sira aproveita didi’ak, tanba madre sira no doadór sira husi rai-li’ur no iha Dili, sira halibur malu tau-osan, ita tenke aproveita didi’ak, haruka labarik sira mai, atu aprende buat ruma hosi madre sira no profesór sira husi Portugál,” nia fó hanoin.
Enkuantu sentru ne’e responsabiliza husi Kongresaun Irmá Reparadorra Nossa Senhora de Fátima, ne’ebé akumula ema kuaze 300-resin kompostu husi labarik no adultu sira.
Notísia relevante: PM Xanana orienta MSSI promove ema ho defisiénsia ne’ebé iha talentu
Jornalista: Sérgio da Cruz
Editór: Evaristo Soares Martins
