DILI, 28 juñu 2024 (TATOLI)–Bispu Dioseze Baucau, Dom Leandro Maria Alves, hateten, profisionál saúde sira halo servisu misaun Kristu nian, tanba besik servisu hodi atende ema moras iha ospitál.
“Ita-boot sira profisaun nu’udar médiku, parteira no enfermeiru ne’e presioza, ita bele dehan ida ne’ebé valor aas tebe-tebes, Tanbasá, tanba Tanba hamoris ema, atu ema kontinua moris iha rai ne’e. Hatutan ema nia vida. Ita labele haree profisaun maibé vokasaun. Halo ema-nia vida naruk liutan, Maromak fó responsabilidade ida-ne’e ba ita, halo parte iha Maromak nia planu atu ema nia vida ne’e naruk liutan. Ne’eduni, ita-boot sira halo servisu ho responsabilidade tomak ho domin no laran tomak, ita boot sira hatudu ita Nai Jesus Kristu ne’ebé doutor no kura ema ne’e rasik. Ema koko iha ita,” Dom Leandro hateten iha selebrasaun aniversariu Ospitál Nasionál Guido Valares (HNGV) ba dala 21 ho tema “Servi ho domin ho responsabilidade”, iha HNGV, Bidau, sesta ne’e.
Nia esplika, ema hotu-hotu hakarak servisu hamutuk ho Maromak, Oinsa halo kna’ar ho fuan ho laran tomak, hosi serbó maluk sira hanesan serbí Nai Maromak rasik mak halo ema ida sai santu.
Kna’ar profisionál saúde hanesan mediku, parteira no enfemeru/a, sira la’ós de’it profisaun ida maibé nu’udar vokasaun no misaun ba moris ida-ne’ebé hala’o.
Profisionál sira presiza haree nu’udar resposta ida-ne’ebé imi halo ba Nai Maromak ho ema-nia liberdade tomak, bainhira remata estudu no foti desizaun atu hili ida ne’ebé, hili atu sai sé, hili konstroe aan sai oinsá ne’e mak resposta tuir dalan Nai Maromak nian.
“Ita haree mós ba ita-nia vokasaun ne’ebé Nai Maromak bolu mai ita hatán ne’e, nu’udar misaun ida. Ne’ebé, ita hala’o kna’ar ida-ne’ebé mak ita simu husi Na’i Maromak tuir ita-nia fiar. Ne’eduni, ita-nia kna’ar ne’ebé ita hala’o ne’e nu’udar misaun ne’ebé fó ita ida-idak, oinsa atu ita konstroe Nai Maromak nia reinu iha rai ne’e. Liuliu, iha ita komunidade ka fatin ita servisu ba,” Bispu Dioseze Baucau, Dom Leandro Maria Alves, hateten iha nia omilia iha misa agradesimentu ba aniversariu Hospitál Nasionál Guido Valares (HNGV) ba dala 21 ho tema “Servi ho domin ho responsabilidade,” iha HNGV.
Kna’a4 ne’e rasik ema hatán no simu ho liberdade, presiza hala’o kna’ar ne’e ho responsabilidade no domin, tuir tema dehan “Servisu ho domin no responsabilidade”.
“Ita-nia orasaun ba ita Nai Jesus Kristu ne’e ita hatudu liuhosi ita-nia serbí ba ita-nia maluk, hatudu ita-nia domin ba ita-nia maluk sira. Fiar iha Jesus konkretiza iha serbí ita-nia maluk sira. Sira-ne’ebé atende ita maluk moras sira, pasiente sira bele koko Kristu nia domin iha ita-nia domin. Ema koko Nai Maromak nia domin liuhosi ita-nia kna’ar sira-ne’e,” nia dehan.
Bainhira hala’o didi’ak imi-nia misaun ne’e katak imi fó ksolok pasiente sira, halo ema kontente no lori ema ba santidade, tanba santidade liuhusi buat ne’ebé ema ida-idak serbisu ba ne’e basá santu la’ós deerepente de’it.
“Se ó hala’o ó-nia kna’ar ho domin, nu’udar orasaun dala-rua ba Maromak no Maromak sei fó grasa ba ó,” nia hateten.
Iha fatin hanesan, Vise-Ministru ba Fortalesimentu Institusionál Saúde, Júlio dos Reis Magno, husu ba profisionál saúde sira atu halo atendimentu ba pasiente ho lalais no mamar.
Governante ne’e promete sei apoia ospitál sira progresivamente iha rekursu hotu hodi profisionál saúde sira bele halo atendimentu di’ak liután ba pasiente sira.
Iha selebrasaun partisipa hosi funsionáriu HNGV, parseiru dezenvolvimentu sira brigada mediku Xina no Cuba.
Jornalista : Jesuína Xavier
Editór : Cancio Ximenes
