BOBONARO, 01 jullu 2024 (TATOLI) – Organizazaun Mundiál Ai-han (WFP, sigla ingles), serbisu hamutuk ho Ministériu Solidariedade Sosiál no Ministériu Administrasaun Estatál, Autoridade Protesaun Sivíl, domingu ne’e apoia ai-han ba família vulnerável hamutuk 858 iha postu administrativu Maliana, munisípiu Bobonaro.
Enkuantu apoia ne’e distribui liuhusi programa asisténsia WFP ba ema sira afetadu bailoro naruk ‘El Nino’ tinan 2024 iha Timor-Leste no nesesidade bázika ne’ebé distribui kada família hetan foos kilograma 25 saka ida, koto kilograma 4,5 no mina litru 1,5.
Notísia relevante: WFP tulun IX Governu kombate má nutrisaun-hasa’e seguransa alimentár
“Apoia ida-ne’e atu hamenus probelma ne’ebé ita-nia komunidade vulnerável sira hasoru, liuliu ba bolsadamain kondisionál ne’ebé mak bazeia ba lista husi suku hitu ne’e totál 858,” Tékniku Sosiál Postu Administrativu Maliana, Felipe Teles, informa ba jornalista sira iha Maliana, segunda ne’e.
Administradór postu administrativu Maliana, Augusto Caetano, apresia no konsidera apoia ne’e bele hakma’an netik komunidade vulnerável sira-nia nesesidade iha loron balun.
“Programa ne’e di’ak tanba WFP rasik halo entrevista komunidade, ema-ne’ebé kbiit laek, agradese WFP bele kontinua apoia ita-nia komunidade sira-ne’ebé kbiit laek, ba inan isin-rua sira no inan sira-ne’ebé fó susu bebé,” nia katak.
Aliança Bui Bere nu’udar benefisiária sente kontente no agradese ba WFP, maske apoia ne’e simu ho kuantidade ne’ebé natoon.
“Ami sente kontente tebes tanba hamenus mós ami-nia susar no terus ne’ebé durante ne’e ami hasoru, ne’ebé ami hakarak husu ba estadu labele para de’it iha-ne’e, tenke kontinua ba oin, ida ne’e ami sente kontente tanba programa ne’e di’ak tebes,” nia fó hanoin.
Enkuantu atividade ne’e hala’o mós iha postu administrativu sira seluk hanesan; Balibó, Atabae, Cailaco, Bobonaro no Lolotoe.
Notísia relevante: WFP promete kontinua apoia TL iha área nutrisaun no seguransa alimentár
Jornalista: Sérgio da Cruz
Editór: Evaristo Soares Martins