Ai-naa sai meza sakrifísiu hasa’e karan lulik ba Maromak
DILI, 02 jullu 2024 (TATOLI)–Vise Koordenadór ba Vizita Papa hosi Igreja no atuál Pároku Igreja Santo António Motael, Pe. Guilhermino da Silva, hateten meja altar ne’ebé halo husi ai-naa ne’e sei hanesan meja altar nian hodi hasa’e karan lulik ba Na’i Maromak.
Notísia Relevante: MAPPF oferese ai-naa hodi konstrui altar iha Tasi-Tolu
Nia esplika, haree ba tema “Atu imi-nia fiar sai imi-nia kultura” hodi liga ba ai-naa ne’ebé uza ba uma no meja altar ne’e signifika boot ba ema Timor, tanba ai-naa ne’e forte, furak no ai-isin ne’ebé uza ba konstrusaun uma lulik sira.
“Agora ai-naa sai fatin no altar santu ida atu hasa’e karan lulik ba Na’i Maromak. Ne’eduni ai-naa sai meza sakrifísiu nian ba Nai Maromak,” Vise Koordenadór ba Vizita Papa hosi Igreja no atual Pároku Igreja Motael ne’e hateten ba Agência Tatoli, iha Motael, segunda (01 juñu 2-24) ne’e.
Ai-naa la’ós ai-naa uluk ba uma-lulik husi bei’ala sira, maibé ai-naa ne’e oferese ona ba ida-ne’ebé kriadór mundu tomak nian.
“Ita oferese ba kriador ida-ne’ebé kria ai-naa ne’e. Ida ne’e mak sentidu tanbasá mak ita foti ai-naa sai meza altar,” nia dehan.
Tuir nia, atributu no objetu ne’ebé uza ba iha misa solene ne’ebé Papa Francisco preside iha Tasi-Tolu, iha 10 setembru, iha tuku 16h00 lorokraik ne’e, sei rai hotu ba muzeu igreja Katólika nian atu bele rai no sai istória ba jerasaun foun sira.
“Atu halo altar iha Tasi-Tolu ita foti ita nia ai-naa rasik iha Timor hodi halo meza altar. Meza altar no buat hotu iha ne’ebá ne’e sei tau iha muzeu tuir planu Governu nian. Atributu no materiál sira-ne’ebé ita uza momentu misa ne’e tantu kadeira, meza altar, ambaun hodi sai istória Timor nia vida no ba jerasaun sira tuir mai,” nia hateten.
Iha future, nia dehan, Papa ida mai vizita tan Timor-Leste ne’e la presiza tan buat sira-ne’e, tanba iha tiha ona sasán ka objetu relijiozu ne’e pronto atu uza de’it.
“Agora ita tenke halo tanba tanba laiha buat ida,” nia dehan.
Nia haktuir, uluk Papa João Paulo II mai vizita Timor-Leste iha 12 Outubru 1989 ne’e, igreja la konserva atributu ka sasán sira uza iha momentu ne’eba ne’e, entaun n iha vizita ida-ne’e fó hanoin ba Governu atu sasán sira ne’ebé santu Padre uza iha 2024 iha misa ne’e, sei rai hotu iha muzeu.
Notísia Relevante: Marco Sprizzi: Konstrusaun altar santu iha Tasi-Tolu sei hela hanesan muzeu
Jornalista : Jesuína Xavier
Editór : Cancio Ximenes
